ٹیکساس : امریکا کی ریاست ٹیکساس میں ہوا کے بگولوں اور میزوری اور آرکنساس میں سیلاب نے تباہی مچادی، مختلف حادثات میں تیرہ افراد ہلاک ہوگئے۔
امریکی ریاست ٹیکساس میں طوفانی بگولوں کی تیز ہوا نے ریاست کو اڑا کے رکھ دیا، ہوا کے بگولوں کی زد میں آکر پانچ لوگ جان سے گئے جبکہ سیکڑوں زخمی ہوئے، طوفان اس قدر بھیانک تھا کہ کئی مکانات کی چھتیں اڑ گئیں،درخت جڑ سے اکھڑ گئےاور کاریں ہوا میں کھلونوں کی مانند اڑ رہی تھیں۔
بگولوں سے بجلی کا نطام تہس نہس ہوگیا ہے۔
ریاستی پولیس کے مطابق بگولوں کے خوف سے شہر چھوڑ کر جانے والے سیکڑوں افراد شاہراہ پر بگولوں کی لپیٹ میں آگئے تھے۔
خیال رہے کہ امریکہ کی ساحلی ریاستوں میں موسمِ سرما کے اختتام پر بگولوں کا جنم لینا معمول کی بات ہے جن کا سلسلہ مئی سے جولائی تک جاری رہتا ہے۔
امریکی ریاست میزوری اور آرکنساس میں سیلاب
دوسری جانب امریکی ریاست میزوری اور آرکنساس میں تیز بارشیں سیلاب کا سبب بن گئیں، بستیوں کی بستیاں ڈوب گئیں ، سڑکیں تالاب کا منظر پیش کرنےلگیں، سیلاب کے بعد دونوں ریاستوں میں ایمرجنسی نافذ کردی گئی ہے، اور امدادی کاروائیاں جاری ہیں۔
سیلاب کے پانی کا اتنا زور تھا کہ اس میں کاریں بہہ گئیں، درخت گر گئے اور بجلی کے تار مکانات پر گر گئے۔
ٹیکساس اور میزوری میں پروازوں کا شیڈول بھی بری طرح متاثر ہوگیا ہے۔
امریکی حکام نے لوگوں کو غیر ضروری گھروں سے باہر نہ نکلنے کی ہدایت کی ہے۔
