اسلام آباد : توشہ خانہ کیس میں چیئرمین تحریک انصاف عمران خان پر فرد جرم عائد کرنے کا تحریری فیصلہ جاری کردیا گیا۔
تفصیلات کے مطابق اسلام آباد کی ڈسٹرکٹ اینڈ سیشن کورٹ نے توشہ خانہ فوجداری کارروائی میں چیئرمین پی ٹی آئی عمران خان پر فرد جرم عائد کرنے کا تحریری فیصلہ جاری کردیا۔
تحریری فیصلہ ایڈیشنل سیشن جج ہمایوں دلاور نے جاری کیا، جس میں کہا گیا کہ فرد جرم کی کارروائی سے قبل عمران خان کے وکلاکی جانب سےاعتراضات اٹھائےگئے، وکیل ملزم کی جانب سے لگائے اعتراضات کو مسترد کیا جاتا ہے اور ملزم پر فرد جرم عائد کی جاتی ہے۔
تحریری فیصلے میں کہا ہے کہ ملزم کی جانب سے عدالت کے کسی سوال کا جواب نہیں دیا گیا اور ملزم نے چارج شیٹ پر دستخط کرنے سے انکار کیا۔
عدالت کا کہنا تھا کہ عدالت استغاثہ کے گواہان کو 13 مئی کیلئے نوٹس جاری کرتی ہے اور 13مئی کو گواہان پیش ہو کے اپنے بیانات قلمبند کروائیں۔
فیصلے کے مطابق خواجہ حارث کی جانب سے عدالت پر اعتراض اٹھایا گیا اور جج تبدیل کرنے کی استدعا کی گئی، اعتراض اٹھایا گیا 5 مئی کے عدالتی فیصلے کو چیلنج کرنا چاہتے ہیں، جب تک اپیل پر فیصلہ نہیں ہو جاتا عدالت کیس نہیں سن سکتی۔
تحریری فیصلے میں کہنا تھا کہ اعتراض اٹھایا گیا سماعت سے ایک دن قبل عدالت کا مقام تبدیل کرنے کا نوٹیفکیشن جاری کیا گیا، مقام تبدیل کرنا انصاف کی فراہمی میں بڑی رکاوٹ قرار دیا جبکہ ملزم کی جانب سے5مئی کاآرڈرتاحال نہ چیلنج کیاگیانہ ہی اس پرکوئی اسٹے دیا گیا۔
