اسلام آباد : سینیٹ اراکین نے توشہ خانہ کے تحائف کی مزید تفصیلات مانگ لیں، ان کا کہنا ہے کہ 1988سے لے کر اب تک کا ریکارڈ جاری کیا جائے۔
تفصیلات کے مطابق ملک کی اہم ترین شخصیات کی جانب سے توشہ خانہ سے تحائف لینے کا معاملہ ایوان بالا تک پہنچ گیا، سینیٹ میں بھی توشہ خانہ سے تحائف لینے کی گونج سنائی دی۔
اس حوالے سے سینیٹر کہدہ بابر اور سینیٹر پرنس عمر احمد زئی نے سوالات سینیٹ سیکرٹریٹ میں جمع کرا دیے۔ سوالات کے مسودے میں دریافت کیا گیا ہے کہ بتایا جائے 1988سے2023توشہ خانہ کے تحائف کی تفصیلات کیا ہیں؟
سینیٹرز کا کہنا ہے کہ یہ بھی بتایا جائے کہ اس وقت کون کون سے تحائف توشہ خانہ میں موجود ہیں؟ اور کتنے تحائف نیلام اور کس کس نے خریدے ایوان کو تفصیلات سے آگاہ کیا جائے۔
واضح رہے کہ گزشتہ روز حکومت نے سال 2002 سے 2022 کے دوران توشہ خانہ سے تحائف وصول کرنے والے سرکاری عہدوں کے حامل افراد کا ریکارڈ پبلک کردیا ہے جن میں سابق صدور، وزرائے اعظم، وفاقی کابینہ کے ارکان، سیاستدان، بیوروکریٹس، ریٹائرڈ جرنیل، جج اور صحافی بھی شامل ہیں۔
رپورٹ کے مطابق وفاقی حکومت کی جانب سے ہدایات جاری ہونے کے بعد توشہ خانہ کی تفصیلات کابینہ ڈویژن کی ویب سائٹ پر اپ لوڈ کر دی گئی ہیں۔
