آکرا: ٹرک اور موٹر سائیکل میں ہولناک تصادم کے بعد تباہی پھیل گئی، 17 افراد ہلاک ہو گئے اور پورا قصبہ صفحہ ہستی سے مٹ گیا۔
تفصیلات کے مطابق مغربی افریقی ملک گھانا کے ایک قصبے میں جمعرات کو ایک موٹر سائیکل کے دھماکا خیز مواد سے بھری گاڑی سے ٹکرانے کے بعد ہونے والے دھماکے میں کم از کم 17 افراد ہلاک اور 59 زخمی ہو گئے ہیں۔
مقامی میڈیا کے مطابق ایسا لگتا ہے کہ دھماکا مغربی گھانا کے ایک چھوٹے سے قصبے Apiate کو مکمل طور پر زمین بوس کر گیا ہے، مقامی شہری نے سی این این کو بتایا کہ وہاں کی تقریباً ہر عمارت منہدم ہو گئی ہے، اور اس کے ملبے تلے لوگ اور جانور دبے ہوئے ہیں۔
عالمی میڈیا رپورٹس کے مطابق گھانا کے شہر بوگوسو میں موٹر سائیکل اور ٹرک کے درمیان تصادم ہوا تھا، جس کے بعد دھماکا ہو گیا، بتایا گیا ہے کہ ٹرک میں دھماکا خیز مواد سے بھری پیٹیاں موجود تھیں، جنھیں کان کنی کی غرض سے لے جایا جا رہا تھا۔
شدید دھماکے کے باعث زمین میں کئی فٹ گہرا گڑھا پڑ گیا اور ارد گرد کی متعدد عمارتیں بھی زمین بوس ہو گئیں، گنجان آباد علاقہ ہونے کی وجہ سے دھماکے سے بہت نقصان ہوا ہے۔
حکام کے مطابق امدادی کارروائیاں مکمل ہو چکی ہیں تاہم زخمیوں میں کئی افراد کی حالت تشویش ناک ہے جب کہ اموات کی تعداد میں اضافہ ہونے کا خدشہ ہے۔
