اسلام آباد : مالی سال 2018-19 ء کے بارہ ماہ ( جولائی تا جون 2018-19ء ) کے دوران برآمدات اور درآمدات پر کنٹرول کے نتیجے میں تجارتی حجم 31 ارب ڈالر کی سطح تک پہنچ گیا ، تجارتی خسارے میں 15.33 فیصدکمی ریکارڈ کی گئی۔
ادارہ برائے شماریات پاکستان (پی بی ایس) کے جاری کردہ اعداد و شمار کے مطابق مالی سال 2018-19 ء کے بارہ ماہ ( جولائی تا جون 2018-19ء ) کے دوران 22 ارب 97کروڑ ڈالر کی برآمدات کی گئیں۔
جو گزشتہ مالی سال2017-18 کے بارہ ماہ ( جولائی تا جون 2017-18ء ) کی 23 ارب 21کروڑ ڈالر کی برآمدات کے مقابلے میں 23کروڑ 30لاکھ ڈالر کم رہیں ۔
اس طرح گذشتہ سال کے مقابلے میں برآمدات میں 1.00 فیصد کمی ریکارڈ کی گئی ، دوسری جانب ملکی درآمدات مالی سال 2018-19 ء کے بارہ ماہ ( جولائی تا جون 2018-19ء ) کے دوران 54 ارب 79کروڑ ڈالر رہیں ۔
جو گذشتہ مالی سا ل 2017-18 ء کے بارہ ماہ ( جولائی تا جون 2017-18ء ) کی 60 ارب 79 کروڑ ڈالر کی درآمدات کے مقابلے میں5 ارب 99کروڑ ڈالر کم رہیں۔
اس طرح درآمدات میں 9.86 فیصدکی کمی ریکارڈ کی گئی ، اعداد و شمار کے مطابق گزشتہ مالی سا ل2017-18 ء کے بارہ ماہ ( جولائی تا جون 2017-18ء ) کے دوران تجارتی خسارہ 37 ارب 58کروڑ ڈالر تھا ۔
جو مالی سال2018-19 ء کے بارہ ماہ ( جولائی تا جون 2018-19ء ) کے 31 ارب 82کروڑ ڈالر کے تجارتی خسارے کے مقابلے میں5 ارب 76 کروڑ ڈالر کم رہا، اس طرح تجارتی خسارے میں 15.33 فیصدکمی ریکارڈ کی گئی۔
