کوپن ہیگن: ڈنمارک میں ٹرین حادثے کے نتیجے میں 6 افراد ہلاک جبکہ 16 زخمی ہوگئے۔
غیرملکی خبررساں ادارے کے مطابق ڈنمارک میں مسافر ٹرین اور مال گاڑی کے درمیان تصادم ہوا جس کے نتیجے میں 6 افراد ہلاک اور 16 زخمی ہوگئے، حادثہ صبح 7:30 بجے پیش آیا۔
ریسکیو اداروں نے زخمیوں کو فوری طور پر طبی امداد کے لیے اسپتال منتقل کیا، اسپتال انتظامیہ کے مطابق تمام زخمیوں کی حالت خطرے سے باہر ہے۔
ٹرین حادثے کے بعد امدادی کاموں کا آغاز کردیا گیا ہے تاہم طوفان کے باعث امدادی کاموں میں مشکلات درپیش ہیں۔
حکام کے مطابق مسافر ٹرین میں 131 مسافر سوار تھے جو کوپن ہیگن جارہی تھی اسی دوران مخالف سمت سے آنے والی مالی گاڑی سے ٹکرا گئی جس کے نتیجے میں حادثہ پیش آیا۔
مزید پڑھیں: ترکی میں دو ٹرینیں ٹکرا گئیں، 9 افراد ہلاک 47 زخمی
ڈنمارک کے وزیراعظم لارس لوئیکے نے ٹرین حادثے پر افسوس کا اظہار کرتے ہوئے زخمیوں کو ہر ممکن سہولیات فراہم کرنے کی ہدایت کی ہے۔
ڈنمارک پولیس کا کہنا ہے کہ تحقیقات کا آغاز کردیا گیا ہے، حادثے کے حوالے مزید شواہد اکٹھے کیے جارہے ہیں۔
مقامی میڈیا کے مطابق حادثے کے وقت سمندر میں بہت تیز ہوائیں چل رہی تھیں اور ایک مال بردار گاڑی کی ایک بوگی کی چھت اُڑ کر مخالف سمت سے آنے والی ایک مسافر ریل گاڑی سے ٹکرا گئی۔
واضح رہے کہ مشرقی اور مغربی ڈنمارک کے درمیان سمندر میں اٹھارہ کلو میٹر طویل یہ ریلوے پل مرکزی جزیرے زی لینڈ کو قریبی جزیرے فونین سے ملاتا ہے۔
