The news is by your side.

Advertisement

ٹرینوں کی آمد و رفت معمول پر نہ آسکی

کراچی: محکمہ ریلوے کے ذرائع کا کہنا ہے کہ ٹرینوں کی آمدورفت 2 ماہ بعد بھی معمول پر نہ آسکی اور کئی ٹرینیں اپنے مقررہ وقت کے کئی گھنٹوں بعد منزل پر پہنچ رہی ہیں۔

ریلوے حکام کے مطابق کراچی ایکسپریس کی آمد میں 8 گھنٹے، تیز گام ساڑھے چار گھنٹے، ہزار ایکسپریس 2 گھنٹے، قراقرم ایکسپریس 7 گھنٹے، سرسید ایکسپریس 2، شاہ حسین 5 گھنٹے تاخیر کا شکار ہے۔

ریلوے ذرائع کا کہنا ہے کہ پاکستان ایکسپریس کی آمد میں بھی تین گھنٹے تاخیر ہوئی۔

ٹرینوں کی آمدورفت میں تاخیر کی وجہ سے مسافر پریشانی کا شکار ہیں اور کراچی سمیت دیگر شہروں کے اسٹیشنز پر مسافروں کا رش لگا ہوا ہے جو اپنی گاڑی کے منتظر ہیں۔

محکمہ ریلوے کی بدانتظامی اور حادثات سے ٹرینوں کی آمدورفت شدید متاثر ہے، ریلوے حکام ٹرین آپریشن کو معمول پر لانے میں ناکام ہیں جس کا خمیازہ مسافروں کو بھگتنا پڑ رہا ہے۔

مسافروں کا کہنا ہے کہ ریلوے کا عملہ بھی انہیں درست معلومات فراہم کرنے سے قاصر ہے جبکہ انکوائری کا نمبربھی نہیں ملتا۔ ریلوے ذرائع کے مطابق اندرون ملک سے ٹرینیں تاخیر سے کراچی پہنچ رہی ہیں۔

اس کے علاوہ واشنگ لائن میں لگنے کے بعد دو سے تین گھنٹوں کی تاخیر سے مسافروں کو لے کرروانہ ہوتی ہیں۔ ریلوے حکام کی غفلت نے مسافروں کے سفر کو مایوس کن بنادیا ہے۔

Comments

comments

یہ بھی پڑھیں