لاہور : ٹریول ایجنٹ عمرہ عازمین کو کروڑوں چونا لگا کر فرار ہوگیا، متاثرہ افراد نے ڈائریکٹر ایف آئی اے کو تحریری درخواست دے دی ہے۔
تفصیلات کے مطابق لاہورمیں ٹریول ایجنٹ 35 سے زائد عمرہ عازمین سے کروڑوں روپے بٹورکرغائب ہوگیا ، فراڈ کرنے والے مبینہ 3 ملزمان روپوش ہیں۔
ملزمان دھرم پورہ مصطفی آباد کے قریب دفتر میں تالا لگا کر فرارہوئے، متاثرہ افراد نے ڈائریکٹر ایف آئی اے کو تحریری درخواست دے دی ہے۔
خیال رہے کہ عمرے پر جانے والے خواہش مند افراد سے فراڈ کا یہ پہلا واقعہ نہیں، پہلے بھی درجنوں واقعات ہو چکے ہیں لیکن قانون نافذ کرنے والے اداروں کی خاموشی اس معاملے میں لمحہ فکریہ ہے۔
یاد رہے 2017 میں کراچی میں عازمین حج کے ساتھ فراڈ کا ایک اور واقعہ منظرعام پر آیا تھا ، جہاں گلشن اقبال میں ٹریول ایجنسی کا مالک 150 سے زائد عازمین حج کے کروڑوں روپے لے کر فرار ہوگیا تھا۔
