The news is by your side.

Advertisement

پاکستانی ٹرک آرٹسٹ کا جارج فلائیڈ کو منفرد انداز میں خراج عقیدت

کراچی: پاکستانی ٹرک آرٹسٹ حیدر علی نے امریکی پولیس کے ہاتھوں قتل ہونے والے سیاہ فام شہری جارج فلائیڈ کو منفرد انداز میں خراج عقیدت پیش کیا۔

تفصیلات کے مطابق کراچی کے رہائشی ٹرک آرٹسٹ حیدر علی نے امریکی پولیس کے تشدد سے جان کی بازی ہارنے والے جارج فلائیڈ کو منفرد انداز میں خراج عقیدت پیش کیا۔

ٹرک آرٹسٹ نے اپنے گھر کی دیوار پر جارج فلائیڈ کی تصویر بنا کر سیاہ فام نسل پرستی کے خلاف لڑنے والوں کو خراج تحسین پیش کیا۔

حیدر علی نے روایتی ٹرک آرٹ کے انداز کو اپناتے ہوئے جارج فلائیڈ کی نہ صرف پینٹنگ بنائی بلکہ ساتھ میں ٹرک پر لکھی جانے والی شاعری کے انداز میں لکھا کہ ہم کالے ہیں تو کیا ہوا دل والے ہیں۔

پاکستانی آرٹسٹ کا کہنا تھا کہ یہ ٹرک آرٹ نہ صرف جارج فلائیڈ بلکہ دنیا بھر میں نا انصافی اور ظلم کے خلاف لڑنے والے ہر شخص کے لیے خراج تحسین ہے۔

انہوں نے بتایا کہ اس واقعے کے بعد میں یہ سوچنے پر مجبور ہوگیا کہ کس طرح مقبوضہ کشمیر، فلسطین، میانمار اور دیگر ممالک میں مسلمانوں پر ظلم کے پہاڑ توڑے جاتے ہوں گے اور وہ اپنا ہر دن کس اذیت اور خوف میں بسر کرتے ہوں گے۔

پاکستانی ٹرک آرٹسٹ حیدر علی نے دنیا سے اپیل کی ہے کہ مظلوم لوگوں کے حق میں آواز بلند کی جائے اور کمزور آواز کو طاقت بخشی جائے تاکہ کوئی ظالم کسی پر ظلم نہ کرسکے۔

Comments

یہ بھی پڑھیں