اوہائیو: امریکا میں معمر جوڑے نے ثابت کردیا کہ محبت آج بھی زندہ ہے، ایک ساتھ دنیائے فانی سے رخصت ہوکر نئی اور انوکھی مثال قائم کردی۔
تفصیلات کے مطابق امریکی ریاست اوہائیو میں ضعیف العمر جوڑے کا 64 سالہ محبت کا سفر ایک ساتھ ہاتھ تھامے ختم ہوگیا۔ دونوں جوڑے نے ساتھ جینے اور مرنے کا وعدہ پورا کردیا۔ سفررخصت کے دوران بھی ایک دوسرے کا ساتھ نہ چھوڑ کر شادی شدہ جوڑے کے لیے عظیم مثال قائم کردی۔
غیرملکی خبررساں ادارے کے مطابق اپنی زندگی کے آخری دن گنے والے جوڑے نے موت کو قریب دیکھتے ہی اپنے بستر بھی ساتھ جوڑ لیے تھے، دونوں کی وفات کے درمیان 4 گھنٹے کا وقفہ تھا۔
88 سالہ بل اسکارفرت اپنی 85 سالہ بیوی نیسی کے ہمراہ ریاست اوہائیو کے شہر ووسٹر میں ایک اولڈ ہوم میں رہتے تھے تاہم ان کی کوئی اولاد نہیں تھی البتہ بل اسکارفرت کے 12 بہن بھائی تھے جن کے اپنی بہت ساری اولادیں ہیں۔
معمر جوڑے کی وفات کے بعد 2 جنوری کو مقامی چرچ ’میری کیتھولک چرچ‘ میں آخری رسومات ادا کی گئیں جہاں سینکڑوں افراد نے شرکت کی، جن میں سے 200 افراد انہیں کے خاندان سے تھے۔ یہ وہی چرچ ہے جہاں مذکورہ جوڑا شادی کے بعد سے ہی عبادات کی غرض سے یہاں کا رخ کرتا تھا۔
بل اسکارفرت پیشے کے اعتبار سے ایک مزدور تھے جبکہ بیوی ایک بینکر تھی۔
