واشنگٹن : امریکی نومنتخب صدر ڈونلڈ ٹرمپ نے کہا ہے کہ امریکہ کو عظیم سے عظیم تربنائیں گے،وہ کام کرینگے جو پہلے کبھی نہیں ہوئے۔
امریکی صدر ڈونلڈ ٹرمپ جمعرات کے دِن واشنگٹن پہنچے، واشنگٹن میں لنکن میموریل ہال میں کنسرٹ سے خطاب میں ڈونلڈ ٹرمپ کا کہنا تھا کہ وہ تبدیلی کے خواہاں ہیں ،امریکہ کی سرحدوں کو مضبوط اور ملک کو عظیم سے عظیم تربنائیں گے۔
ان کا کہنا تھا کہ ایسے کام کرینگے جو دہائیوں سے امریکہ کیلئے نہیں کیے گئے، جس وقت الیکشن جیت رہا تھا، اس وقت حقائق کو الٹا بیان کیا گیا تھا۔ یہ ان لوگوں کے جشن کا موقع ہے جنہیں فراموش کردیا گیا تھا۔
Thank you for a wonderful evening in Washington, D.C. #Inauguration pic.twitter.com/a6xpFQTHj5
— Donald J. Trump (@realDonaldTrump) January 20, 2017
ٹرمپ کا کہنا ہے کہ امریکی عوام حقیقی تبدیلی چاہتے ہیں اور عوام سےتبدیلی کا وعدہ ہے۔
ڈونلڈ ٹرمپ نے اس عزم کا اعادہ کیا کہ وہ امریکیوں کو ملازمت کی فراہمی کیلئے سخت محنت کرینگے اور تارکین وطن کو امریکیوں کا حق مارنے نہیں دینگے۔
ٹرمپ نے آرلنگٹن نیشنل سمیٹری میں پھولوں کی چادر چڑھائی، جہاں 400000 سے زائد سابق فوجیوں اور اُن کے اہل خانہ کی قبریں ہیں۔
لنکن میموریل ہال میں ہونیوالے کنسرٹ میں نامور گلوکاروں نے اپنی آواز کا جادو جگایا اور تقریب کے اختتام پر آتشبازی کا شاندار مظاہرہ کیا گیا۔
خیال رہے کہ امریکی صدر ڈونلڈ ٹرمپ آج عہدے کا حلف اٹھائیں گے۔
