واشنگٹن: امریکی صدر ڈونلڈ ٹرمپ نے کہا ہے کہ گزشتہ 7 روز سے کرونا پوزیٹو کیسز میں کمی آ رہی ہے، ملک کو دوبارہ کھولنے کے لیے بہت پرجوش ہیں۔
امریکی صدر کرونا ٹاسک فورس کے ہمراہ پریس کانفرنس کر رہے تھے، انھوں نے کہا کہ 80 ملین امریکیوں کو امداد موصول ہو چکی ہے، ملکی معیشت کی تعمیر نو کریں گے۔
ڈونلڈ ٹرمپ کا کہنا تھا کہ ایف ڈی اے نے گھروں میں ٹیسٹ کرنے کی ڈیوائس کی منظوری دے دی ہے۔
پریس کانفرنس میں نائب امریکی صدر مائیک پنس نے کہا کہ ان کی تمام گورنرز کے ساتھ آج تفصیلی گفتگو ہوئی، کانفرنس کال پر 50 ریاستوں کے گورنرز موجود تھے، انھوں نے کہا کہ مختلف ریاستوں میں ڈرائیو تھرو کرونا ٹیسٹنگ کی سہولیات کام کر رہی ہیں، ہم کرونا ٹیسٹنگ کی سہولیات کو مزید بڑھا رہے ہیں۔
یاد رہے کہ ایک دن قبل امریکی صدر ڈونلڈ ٹرمپ نے 484 ارب ڈالر کے امدادی بل پر دستخط کیے تھے، اس امداد کے تحت ملک میں متاثر ہونے والے چھوٹے کاروباروں کو قرض فراہم کیا جا رہا ہے، یہ وبا کی وجہ سے لاک ڈاؤن میں اب تک کا سب سے بڑا ریلیف پیکج ہے جس کا ٹرمپ نے اعلان کیا۔
واضح رہے کہ امریکا میں کرونا وائرس سے ہلاکتیں 52,185 ہو چکی ہیں، جو دنیا میں وائرس سے سب سے زیادہ اموات ہیں، جب کہ کو وِڈ نائنٹین کے کیسز کی مجموعی تعداد بھی 9 لاکھ 25 ہزار سے بڑھ گئی ہے۔
