واشگٹن: امریکی خفیہ ایجنسی کے سربراہ نے نو منتخب صدر ٹرمپ کوخاموش رہنے کا مشورہ کیا دیا، ٹرمپ نے ان کی تبدیلی کا اشارہ دے دیا۔
غیر ملکی خبر رساں ایجنسی کے مطابق نو منتخب امریکی صدر ڈونلڈ ٹرمپ نے امریکی خفیہ ایجنسی سی آئی اے کے سربراہ جان برینن کی تبدیلی کا اشارہ دے دیا۔
ایک روز قبل جان برینن صدر ٹرمپ کو اپنی زبان قابو میں رکھنے کا مشورہ دے چکے تھے۔
ایک انٹرویو میں جان برینن نے کہا تھا کہ ڈونلڈ ٹرمپ کو بات کرتے ہوئے اور سوشل میڈیا پر اظہار خیال کرتے ہوئے محتاط رہنا ہوگا۔ انہیں یقینی بنانا ہوگا کہ ان کی کسی بات سے ملکی مفاد کو نقصان نہ پہنچے۔
جان برینن کا کہنا تھا کہ امریکی صدر ٹوئٹر پر قومی اہمیت کے پیغام نہیں دے سکتا۔ امریکا کا صدربننے کے بعد معاملہ ٹرمپ کا ذاتی نہیں بلکہ قومی مفاد کا ہوگا۔
واضح رہے کہ صدر ٹرمپ 20 جنوری کو صدارت کا حلف اٹھا لیں گے۔
