واشنگٹن : نو منتخب امریکی صدرڈونلڈ ٹرمپ نے شدید دباؤ کے باوجود کاروبار سے علیحدہ ہونے سے انکار کردیا، ان کا کہنا ہے وہ حکومت کے ساتھ اپنا کاروبار بھی جاری رکھیں گے۔
ڈونلڈ ٹرمپ پر صدارت سنبھالنے کے بعد کاروبار سے علیحدہ ہونے کے لئے شدید دباؤ ہیں لیکن نو منتخب امریکی صدر نے کاروبار سے الگ ہونے سے صاف انکار کردیا ہے۔
ڈیموکریٹک سینٹر نے ایک قرارداد پیش کرنے کا اعلان کیا ہے، جس میں ٹرمپ سے مدت صدارت کے دوران کاروبار سے الگ ہونے کا مطالبہ کیا جائے گا، جس کے مطابق صدر اپنے عہدے کو کاروباری مقاصد کیلئے استعمال نہیں کر سکیں گے۔
خیال رہے کہ امریکی قانون میں صدر کی اپنے کاروباری مفادات سے لا تعلقی ضروری نہیں تاہم ماضی میں امریکی صدور اپنے کاروباری لین دین سے الگ رہے ہیں۔
مزید پڑھیں : سرکاری اور کاروباری معاملات میں مفادات کا ٹکراؤ نہیں ہوگا، ٹرمپ
دوسری جانب ہالی وڈ کی مشہور واک آف فیم پر ٹرمپ کے نام کا ستارہ بھی دوبارہ نصب کردیا گیا ہے، صدارتی مہم کے دوران ستارے کو نامعلوم افراد نے نقصان پہنچایا تھا۔
یاد رہے نیویارک ٹائمز کو انٹرویو دیتے ہوئے ڈونلڈ ٹرمپ کا کہنا تھا کہ ضروری نہیں ہے کہ صدارت سنبھالنے کے بعد اپنے کاروبار سے رابطہ منقطع کر لوں، میں بہترین انداز میں اپنی کاروباری ذمہ داریاں سنبھالنے کے ساتھ ملک کو بھی بہترین انداز میں چلا سکتا ہوں۔
انکا کہنا تھا کہ سرکاری اور کاروباری معاملات میں مفادات کا ٹکراؤ نہیں ہوگا۔
