واشنگٹن : ڈونلڈ ٹرمپ نے امریکی ریاست میں اجتماع سے خطاب کے دوران کہا کہ مجھے اور شمالی کوریا کے صدر کو ایک دوسرے سے عشق ہوگیا ہے۔
تفصیلات کے مطابق امریکی صدر ڈونلڈ ٹرمپ جو آئے روز اپنی ذات سے متعلق کوئی نہ کوئی ایسا بیان دیتے رہتے ہیں جو فوری خبروں کی زینت بن جاتا ہے، گذشتہ روز بھی ڈونلڈ ٹرمپ نے امریکی ریاست ورجینیا میں کم جونگ اُن سے متعلق ایسا ہی بیان دیا ہے جو دنیا بھر میں آگ کی طرح پھیل گیا۔
امریکی خبر رساں ادارے کا کہنا تھا کہ ڈونلڈ ٹرمپ نے مغربی ورجینیا میں ایک بڑے عوامی جلسے سے خطاب کرتے ہوئے کہا تھا کہ مجھے شمالی کوریا کے صدر کم جون اُن سے محبت ہوگئی ہے۔
غیر ملکی میڈیا کے مطابق امریکی صدر نے ورجینیا میں تقریر کرتے ہوئے کہا کہ میری اور کم جونگ اُن کی مذاکرات کے سلسلے میں سنگاپور میں ہونے والی پہلی ملاقات کے بعد سے شمالی کوریا کے سربراہ نے مجھے خوبصورت خط ارسال کیے اور یہ سلسلہ ابھی تک جاری ہے۔
ڈونلڈ ٹرمپ نے تقریر کے دوران بھی عوام کو ہنسانے کا کام انجام دیتے ہوئے کہا کہ گذشتہ دنوں اقوام متحدہ کی جنرل اسمبلی میں خطاب کے بعد بھی کم جون نے مجھے لیٹر بھیجا جس کے بعد ہمارے تعلقات مزید بہتری کی جانب بڑھے اور ہم دونوں ایک دوسرے کے عشق میں مبتلا ہوگئے۔
خیال رہے کہ امریکی صدر ڈونلڈ ٹرمپ نے رواں ہفتے اقوام متحدہ کم جون ان کی تعریفوں کے پل باندھتے ہوئے جوہری ہتھیاروں کے دلدادہ شمالی کوریا کے صدر کم جونگ کو ’راکٹ مین‘ کہا تھا۔
