واشنگٹن: امریکی صدر ڈونلڈ ٹرمپ نے خام تیل پیدا کرنے والے ممالک کی تنظیم اوپیک سے مطالبہ کیا ہے وہ عالمی منڈی میں تیل کی قیمتیں کم کرے۔
تفصیلات کے مطابق امریکی صدر نے اوپیک پر زور دیا ہے کہ بغیر کسی وجہ کے تیل کی قیمتوں میں ہونے والے اضافے پر غور کرے اور قیمتوں کی کمی کے لیے عملی اقدامات کیے جائیں۔
غیر ملکی خبر رساں ادارے کا کہنا ہے کہ ایرانی تیل کی خریداری کرنے والے ممالک پر امریکی پابندیوں کی دھمکی کے بعد تیل کی قیمتیں مزید بڑھی ہیں۔
مذکورہ پابندی کے بعد سعودی حکام نے امریکا کو یقین دہانی کرائی تھی کہ تیل کی عالمی منڈی میں استحکام رہے گا، پابندیوں کی صورت میں ایران کا مشرقی وسطیٰ میں اثرورسوخ کم ہوجائے گا۔
صدر ٹرمپ کے مطابق امریکی اتحادی ممالک جیسے کہ سعودی عرب ہے، وہ خام تیل کی پیداوار میں اضافہ کریں گے تاکہ عالمی منڈیوں میں استحکام رہے۔
خیال رہے کہ امریکہ نے یہ الزام لگایا کہ ایران تیل کی آمدن کا بڑا حصہ مشرق وسطی اور خطے میں عدم استحکام پھیلانے کے لیے خرچ کرتا ہے، امریکہ نے گذشتہ برس نومبر میں ایران پر پابندیاں عائد کرنے کے بعد ایرانی تیل خریدنے والے ممالک کو آٹھ بار استثنیٰ دیا تھا اور اب دو مئی کو یہ ختم کیا جا رہا ہے۔
ایران اپنی ضرورت کے مطابق تیل برآمد کرے گا، آیت اللہ خامنہ ای
بعد ازاں ماہرین نے یہ خیال ظاہر کیا تھا کہ ایران پر امریکی پابندیوں کے بعد عالمی مارکیٹ میں روزانہ 12 لاکھ بیرل تیل کی کمی ہوجائے گی تاہم اس کا انحصار اس بات پر ہے کہ کتنے ممالک امریکی اعلان کے باوجود ایران سے تیل کی خریداری جاری رکھتے ہیں۔
