واشنگٹن: امریکی صدر ڈونلڈ ٹرمپ نے اپنے سخت حریف شمالی کوریا کے سربراہ کم جانگ ان کو سالگرہ کی مبارکباد کا پیغام بھیج کر سب کو چونکا دیا۔
شمالی کوریا کو صفحہ ہستی سے مٹانے کی دھمکیاں دینے والے امریکی صدر کو کم جانگ ان کا یوم پیدائش تک یاد رہا، دشمن ملک کے سربراہ کے جنم دن کو یاد رکھنے اور پھر مبارکباد کے پیغام بھیجنے پر عالمی رہنما حیرت زدہ ہیں۔
ٹرمپ نے اپنے حلیف اور شمالی کوریا کے حریف ملک جنوبی کوریا کے مشیر برائے سلامتی امور کے ذریعے کم جانگ ان کو مبارکباد کا پیغام بھجوایا ہے۔
جنوبی کوریائی مشیر شانگ نے رواں ہفتے واشنگٹن میں امریکی صدر سے ملاقات کی تھی جس کے بعد وہ اپنے ملک لوٹے تھے، وطن واپسی پر میڈیا کو انہوں نے بتایا کہ ملاقات میں امریکی صدر نے شمالی کوریائی سربراہ کو "ہیپی برتھ ڈے” کا پیغام پہنچانے کی ذمہ داری لگائی تھی جو انہوں نے پوری کرتے ہوئے شمالی کوریا تک پیغام پہنچا دیا ہے۔
واضح رہے کہ کم جانگ ان کی پیدائش کی تاریخ کو خفیہ رکھا گیا ہے تاہم امریکی فہرست میں شمالی کوریائی لیڈر کی یوم پیدائش کی تاریخ 8 جنوری 1984 درج ہے اور وہ اس اعتبار سے 36 سال کے ہوچکے ہیں۔
