واشنگٹن: امریکی صدر ڈونلڈ ٹرمپ نے اپنے ملک کی بڑی ٹیکنالوجی فرم گوگل پر یورپی یونین کے بھاری جرمانے کی مذمت کرتے ہوئے کہا ہے کہ یورپ کو امریکا سے مزید فائدہ نہیں اٹھانے دیں گے۔
امریکی صدر ڈونلڈ ٹرمپ کا سماجی رابطے کی ویب سائٹ ٹویٹر پر اپنے پیغام میں کہنا تھا کہ میں آپ کو بتاتا ہوں کہ یورپی یونین نے ہماری بڑی کمپنیوں میں سے ایک گوگل پر پانچ ارب ڈالرز کا جرمانہ عائد کردیا ہے، انہوں نے حقیقی معنوں میں امریکا سے فائدہ اُٹھایا ہے لیکن یہ معاملہ اب زیادہ دیر نہیں چلے گا۔
یورپی یونین نے چند روز قبل گوگل پر اس کے اینڈرائیڈ موبائل آپریٹنگ سسٹم کی خلاف ورزیوں پر ریکارڈ چار ارب تیس کروڑ یورو (پانچ ارب ڈالرز) جرمانہ عائد کیا ہے۔
I told you so! The European Union just slapped a Five Billion Dollar fine on one of our great companies, Google. They truly have taken advantage of the U.S., but not for long!
— Donald J. Trump (@realDonaldTrump) July 19, 2018
یورپی کمیشن کی مسابقتی کمشنر مارگریتھ ویسٹاگر نے برسلز میں نیوز کانفرنس کرتے ہوئے کہا تھا کہ گوگل نے تین بنیادی شعبوں میں اینڈرائیڈ مارکیٹ کی خلاف ورزی کا ارتکاب کیا ہے، گوگل اپنے سرچ انجن اور کروم ایپلی کیشنز کو ایک آپریٹنگ سسٹم میں مجتمع کررہی ہے اور اس نے مبینہ طور پر موبائل فون بنانے والی کمپنیوں کو ایسی ڈیوائسز کی تیاری سے روک دیا ہے جن کے ذریعے اینڈرائیڈ کے مختلف ورژنز کو چلایا جاسکتا ہے۔
یورپی کمیشن نے اپنے فیصلے میں کہا ہے کہ گوگل نے ایسا کوئی قابل اعتبار ٹھوس ثبوت پیش نہیں کیا ہے جس سے یہ پتا چلتا ہو کہ اینڈرائیڈ فنی نقائص سے متاثر ہوگا یا ایپلی کیشنز کی سپورٹ میں ناکام رہے گا۔
یورپی یونین نے گزشتہ سال گوگل پر دو ارب ستر کروڑ ڈالرز جرمانہ عائد کیا تھا یہ اس کی آن لائن خریداری خدمات کے تلاش کے نتائج میں ردو بدل پر کیا گیا تھا گوگل نے اس کے خلاف بھی اپیل دائر کی تھی مگر اس کا ابھی تک فیصلہ نہیں ہوسکا ہے۔
