واشنگٹن: امریکی صدر ڈونلڈ ٹرمپ نے خبردار کیا ہے کہ اگر ایران نے امریکا کے خلاف کوئی کارروائی کی تو وہ بھاری خمیازہ بھگتے گا۔
تفصیلات کے مطابق ایران اور امریکا کے درمیان تنازعہ شدت اختیار کرچکا ہے، دونوں ممالک کی جانب سے ایک دوسرے پر سنگین الزامات عائد کیے جارہے ہیں، جبکہ دھمکیوں کا سلسلہ بھی جاری ہے۔
غیر ملکی خبر رساں ادارے کے مطابق امریکی وائٹ ہاؤس میں صحافیوں سے گفتگو کرتے ہوئے ٹرمپ نے ایران کو خبردار کیا کہ اگر امریکی مفادات کو ٹھیس پہنچی تو ایران کو سنگین تنائج بھگتنا ہوں گے۔
متحدہ عرب امارات کی سمندری حدود میں سعودی تیل بردار جہازوں پر حملے پر عالمی سطح پر شدید تشویش پائی جاتی ہے، جبکہ ان حملوں کا الزام بھی ایران پر عائد کیا جارہا ہے۔
امریکی صدر نے ایرانی دھمکیوں اور مذکورہ حملے کے تناظر میں ایران کو خبردار کیا ہے کہ وہ اپنی سرگرمیوں سے باز رہے، اس سے قبل امریکی وزیرخارجہ مائیک پامپیو بھی ایرانی حکام کو تنبیح کرچکے ہیں۔
مائیک پومپیو کا کہنا تھا کہ اگر ایران نے کوئی حملہ کیا تو اس کے جواب میں امریکا فوری اور فیصلہ کن ردعمل ظاہر کرے گا۔
خیال رہے کہ ایران اور امریکا کے درمیان جاری کشیدگی پر یورپ نے شدید تشویش کا اظہار کرتے ہوئے معاملے کے حل پر زور دیا ہے۔
ایران امریکا کشیدگی، یورپ نے تشویش کا اظہار کردیا
واضح رہے کہ ایران نے مؤقف اختیار کیا ہے کہ عالمی مالیاتی امور میں شفافیت کے قوانین پر عملدرآمد کا یورپ اور ایران کے درمیان تجارتی روابط یا سہولیات کے ساتھ کوئی تعلق نہیں ہے۔
