واشنگٹن : امریکی صدر ڈونلڈ ٹرمپ نے افغان طالبان کے ساتھ مذاکرات دوبارہ شروع کرنے کا عندیہ دے دیا۔
تفصیلات کے مطابق افغانستان میں امن و استحکام کی خاطر امریکی صدر نے طالبان سے ایک مرتبہ پھر مذاکرات کا عمل دوبارہ شروع کرنے کا عندیہ دیا ہے۔
غیر ملکی خبر رساں ادارے کا کہنا تھا کہ ڈونلڈ ٹرمپ کی جانب سے دوبارہ مذاکرات کا ارادہ طالبان کی قید سے امریکی اور آسٹریلوی پروفیسرز کی رہائی کے نتیجے میں کیا ہے۔
سرکاری ٹی وی کے مطابق ترجمان تحریک طالبان افغانستان ذبیح اللہ مجاہد کا کہنا ہے کہ اس بارے میں کچھ کہنا ابھی قبل از وقت ہے۔
مزید پڑھیں : زلمے خلیل کی افغان صدر سے ملاقات، امریکا طالبان مذاکرات پر گفتگو
واضح رہے کہ افغان امن عمل میں امریکا اور طالبان کے وفود کے مابین متعدد ملاقاتوں کے بعد معاہدے کے نکات کو حتمی شکل دی جاچکی تھی، تاہم محض معاہدے پر دستخط سے پہلے افغانستان میں ایک امریکی فوجی کی ہلاکت کے بعد امریکی صدر نے ٹوئٹر پر طالبان سے تمام مذاکرات کو منسوخ کرنے کا اعلان کردیا تھا۔