نو منتخب امریکی صدر ڈونلڈ ٹرمپ ایک بار پھر غلط ٹوئٹ کر کے دنیا بھر میں مذاق کا نشانہ بن گئے۔ انہوں نے اپنے ٹوئٹ میں اپنی بیٹی ایوانکا کی جگہ کسی دوسری ایوانکا کا ذکر کردیا۔ مذکورہ ایوانکا نے موقع سے فائدہ اٹھا کر ٹرمپ کو کلائمٹ چینج کی طرف توجہ مرکوز کرنے کا مشورہ دے ڈالا۔
دو دن بعد صدارت کا حلف اٹھانے والے ڈونلڈ ٹرمپ ایک بار پھر سماجی رابطوں کی ویب سائٹ ٹوئٹر کو بے احتیاطی سے استعمال کرنے پر تنقید و مذاق کا نشانہ بن گئے۔
یہ ساری کہانی دراصل اس وقت شروع ہوئی جب امریکی ریاست میسا چیوسٹس سے تعلق رکھنے والے ایک ڈاکٹر لارنس گڈ اسٹین نے ڈونلڈ ٹرمپ کی بیٹی ایوانکا ٹرمپ کی تعریف میں ٹوئٹ کیا۔
انہوں نے اپنے ٹوئٹ میں ڈونلڈ ٹرمپ اور ان کی بیٹی ایوانکا ٹرمپ کو ٹیگ کرنا چاہا لیکن غلطی سے ایوانکا ٹرمپ کی جگہ ایوانکا میجک کو ٹیگ کردیا جو برطانیہ میں ایک ڈیجیٹل کنسلٹنٹ ہیں۔
بیٹی کی اس تعریف پر صدر ٹرمپ خوشی سے پھولے نہ سمائے اور اسی غلطی کے ساتھ بیٹی کی تعریف میں خود بھی ایک ٹوئٹ کردیا جس میں انہوں نے اپنی بیٹی کو نہایت باکردار اور عظیم قرار دیا۔
"@drgoodspine: @realDonaldTrump @Ivanka Trump is great, a woman with real character and class.”
— Donald J. Trump (@realDonaldTrump) January 17, 2017
ٹرمپ کی اس غلطی کی نشاندہی ہوتے ہی ٹوئٹر پر ایک طوفان آگیا اور لوگوں نے ٹرمپ کو تنقید و مذاق کا ہدف بنا لیا۔
دوسری جانب غلطی سے ٹرمپ کے ٹوئٹ میں آنے والی ایوانکا میجک نے موقع سے فائدہ اٹھا کر ٹرمپ کو مفید مشوروں سے نواز دیا۔
انہوں نے ٹرمپ کو جواب دیتے ہوئے کہا، ’آپ پر بہت بڑی ذمہ داریاں ہیں۔ کیا میں آپ کو تجویز دوں کہ ٹوئٹر کا استعمال احتیاط سے کریں اور کلائمٹ چینج کے بارے میں جاننے کے لیے مزید وقت صرف کریں‘۔
@realDonaldTrump @drgoodspine And you’re a man with great responsibilities. May I suggest more care on Twitter and more time learning about #climatechange. pic.twitter.com/kBMEGZYtig
— Ivanka Majic (@ivanka) January 17, 2017
ایوانکا نے اس ٹوئٹ کے ذریعہ ٹرمپ کی توجہ ماحولیاتی نقصانات اور موسمیاتی تغیرات کی جانب دلوانے کی کوشش کی جو پہلے ہی ماحول سے دشمنی پر تلے بیٹھے ہیں۔
اپنی انتخابی مہم کے دوران ٹرمپ بارہا کلائمٹ چینج کو ایک وہم اور مضحکہ خیز چیز قرار دے چکے ہیں جس نے ماحول کی بہتری کے لیے کام کرنے والوں کو سخت تشویش میں مبتلا کردیا۔
انہوں نے امریکا میں کوئلے کی صنعت کی بحالی سمیت کئی ماحول دشمن اقدامات شروع کرنے کا عندیہ بھی دیا ہے۔
اس سے قبل آسکر ایوارڈ یافتہ ہالی ووڈ اداکار اور اقوام متحدہ کے خیر سگالی سفیر برائے ماحولیاتی تبدیلی لیونارڈو ڈی کیپریو نے بھی صدر ٹرمپ، ان کی بیٹی ایوانکا اور ان کے عملے کے دیگر ارکان سے ملاقات کی تھی۔
ملاقات میں لیو نے قابل تجدید توانائی کے کئی منصوبے پیش کیے تھے جن کے ذریعہ نئی نوکریاں پیدا کر کے امریکی معیشت کو سہارا دیا جاسکتا ہے۔