ممبئی: تونیشا شرما خود کشی کیس میں شیزان خان کے وکیل شیلندر مشرا نے معاملے کا نیا رخ پیش کردیا۔
ممبئی واسائی کورٹ میں شیزان خان کی ضمانت سے متعلق سماعت پر وکیل شیلندر مشرا نے کورٹ کو بتایا کہ تونیشا شرما نے موت سے صرف 15 منٹ پہلے ڈیٹنگ ایپ پر علی نامی لڑکے سے بات کی تھی۔
شیزان کے وکیل نے بتایا کہ میرے موکل سے بریک اپ کے بعد تونیشا نے ڈیٹنگ ایپ جوائن کرلیا تھا، جہاں وہ علی نامی لڑکے کو ڈیٹ کرتی تھی۔
ان کا کہنا تھا کہ اداکارہ نے خودکشی سے صرف 15 منٹ پہلےعلی سے ویڈیو کال کی، میرا موکل نہیں وہ علی تھا، جس سے تونیشا رابطے میں تھی۔
تونیشا شرما اور شیزان خان کی والدہ کی واٹس ایپ چیٹ سامنے آگئی
وکیل شیلندر مشرا نے مزید کہا کہ تونیشا خودکشی کے لیے ذہنی طور پر تیار تھی، اپنے پراعتماد ساتھی اداکار پارتھ سے رسی لاکر دینے کےلیے بھی کہا تاکہ وہ زندگی کا خاتمہ کرسکے۔
وکیل کا یہ بھی کہنا تھا کہ میرے موکل نے جب یہ باتیں سنیں تو تونیشا کے خاندان سے رابطہ کیا، انہیں خبردار کیا اور کہا کہ اداکارہ کا خیال رکھیں۔
شیزان کے وکیل نے کہا کہ میرے موکل اور تونیشا شرما کے تعلقات بریک اپ کے بعد بھی خوشگوار تھے، وہ دونوں ہی شو کی شوٹنگ میں تسلسل سے حصہ لے رہے تھے۔
تونیشا شرما کی خودکشی کے چند لمحے بعد کی ویڈیو سامنے آگئی
شیلندر مشرا نے عدالت میں کہا کہ میرے موکل پر الزام لگایا جارہا ہے کہ وہ تونیشا کو اردو بولنے پر مجبور کرتا تھا جبکہ حقیقت یہ ہے کہ وہ خود بھی اس زبان سے واقف نہیں، اس کی بہنیں بھی اردو نہیں جانتیں، وہ تو ڈائریکٹر کی ڈیمانڈ پر اپنی لائنیں سیکھتا ہے۔
انہوں نے مزید کہا کہ تونیشا شرما کی باحجاب تصاویر کی بنیاد پر میرے موکل پر مذہب تبدیلی کےلیے دباؤ ڈالنے کا الزام لگایا گیا، دراصل جو لباس اداکارہ نے زیب تن کیا وہ شو کی ڈیمانڈ تھا۔
تونیشا کی موت کے بعد شیزان نے فون پر 2 گھنٹے کس سے بات کی؟
شیزان کے وکیل نے یہ بھی کہا کہ میرے موکل کو صرف مذہب کی بنیاد پر گرفتار کرکے معاملے کو لو جہاد کا اینگل دیا گیا، وہ مجھ سے پوچھ گچھ کرسکتے تھے تاکہ سچ سامنے آجائے لیکن مجھے مسلمان ہونے کی وجہ سے گرفتار کیا گیا۔
شیلندر مشرا کا کہنا تھا کہ میرے موکل کے خلاف کوئی ثبوت نہ ہونے کے باوجود مقدمہ درج کیا گیا، دراصل پہلے یہ طے ہونا چاہیے کہ تونیشا شرما کی موت خودکشی تھی یا کچھ اور تھا؟ میں کیس کے تمام حقائق عدالت کے روبرو رکھ چکا ہوں۔
تونیشا شرما کے ساتھی اداکار اور سابقہ دوست شیزان خان اس وقت پولیس کی تحویل میں ہے، انہیں آنجہانی اداکارہ کی والدہ کے خود کشی پر اکسانے کے الزام پر گرفتار کیا گیا۔
واضح رہے کہ20 سالہ بھارتی اداکارہ نے ٹی وی شو ’علی بابا داستان کابل‘ کے سیٹ پر گزشتہ ماہ خودکشی کی تھی۔
