انقرہ : ترک وزیرخارجہ کا کہنا ہے کہ فلسطینیوں کو بتاتے ہیں آپ اکیلے نہیں ہم آپ کے ساتھ ہیں، ایسارویہ ناقابل قبول ہےاورنہ ہم برداشت کرینگے، ہمیں کوئی ڈرا نہیں سکتا۔
تفصیلات کے مطابق ترک وزیرخارجہ مولود چاوش اوگلو کا کہنا ہے ہم سب کی طرح فلسطینیوں کوبھی جینےکاحق ہے، فلسطینیوں کوکئی دہائیوں سے تشدد کا نشانہ بنایا جارہا ہے۔
مولود چاوش کا کہنا تھا کہ فلسطینیوں کوبتاتےہیں آپ اکیلےنہیں ہم آپ کےساتھ ہیں، اوآئی سی نےیکطرفہ طورپرامریکی فیصلے کو مسترد کردیا، امریکا نے ممبرز کو خبردار کیا تھا کہ قرارداد کیخلاف ووٹ دیں۔
انھوں نے مزید کہا کہ امریکہ کا ایسارویہ ناقابل قبول ہے اور نہ ہم برداشت کرینگے، ہمیں کوئی ڈرا نہیں سکتا۔
مزید پڑھیں : جس کی لاٹھی اس کی بھینس والا قانون نہیں چلےگا، ترک وزیر خارجہ
گذشتہ روز بھی ترک وزیرخارجہ نے ٹرمپ کی امداد بند کرنے کی دھمکی کو مسترد کرتے ہوئے کہا تھا کہ ٹرمپ کے متنازعہ فیصلے کوتسلیم کرانے کیلئے امریکی دھمکیاں اور دباؤ کو کوئی بھی ریاست کو قبول نہیں کریگی۔
ان کا کہنا تھا کہ امریکہ یہ سمجھتا ہے کہ وہ طاقتور ہے، اسی لیے وہ ٹھیک ہے لیکن اب جس کی لاٹھی اس کی بھینس والا قانون نہیں چلے گا۔
خیال رہے کہ امریکی صدر نے دھمکی دی تھی کہ امریکہ اربوں ڈالر کی امداد دیتا ہے، جن ممالک نے یروشلم کو دارالخلافہ تسلیم کرنے کے حق میں ووٹ نہ دیا تو انہیں اس کا خمیازہ بھگتناپڑے گا۔
اس سے قبل اقوام متحدہ میں امریکا کی مستقل مندوب نیکی ہیلی نے دھمکی آمیز لہجے میں کہا تھا کہ جمعرات کو اقوام متحدہ میں امریکا کے یروشلم کو اسرائیل کا دارالخلافہ تسلیم کرنے کے خلاف ووٹ دیا جائے گا اور ہمارے آئینی حق پر شدید تنقید بھی کی جائے گی، ایسے کرنے والے ممالک کے نام ہم نوٹ کریں گے۔
