ترک خلائی ایجنسی کے صدر سردار حسین یلدرم نے کہا ہے کہ چاند تک پہنچنا ترکی کے قومی خلائی پروگرام کا ایک اہم ہدف ہے۔
ترک نیوز ایجنسی کے مطابق ترکی 2 سال کے اندر چاند پر جس خلائی گاڑی کو روانہ کرے گا وہ تیاری کے مراحل میں ہے۔
اس حوالے سے ترک خلائی ایجنسی کے صدر سردار حسین یلدرم نے مقامی میڈیا کو دیے گئے ایک بیان میں کہا ہے کہ چاند تک پہنچنا ترکی کے قومی خلائی پروگرام کا ایک اہم ہدف ہے اور یہ پروگرام ترکی کو بہت آگے لے کرجائے گا۔
سردار یلدرم نے مزید کہا کہ ترکی دو سال کے اندر چاند پر جس خلائی گاڑی کو روانہ کرے گا وہ تیاری کے مراحل میں ہے۔
ایجنسی صدر کے مطابق اس کا انجن100فیصد مقامی ہائبرڈ راکٹ انجن ہے جو پہلے ہی سے تیار ہے اب اسے خلائی گاڑی میں نصب کرنے اور خلا کے حالات کے مطابق ڈھالنے پر کام جاری ہے۔
ان کا کہنا تھا کہ ترکی چاند تک رسائی حاصل کرنے کے علاوہ چاند پر مستقل نقوش چھوڑنا چاہتا ہے۔
سردار یلدرم نے بتایا کہ اس مشن میں ہمارا جھنڈا چاند پر لہرایا جائے گا اور اس کی سطح پر لہراتا رہے گا، ہم اسے اس طریقے سے چاند کی سطح کے اس حصے پر نصب کریں گے جہاں اسے ترکی کی سرزمین سے ٹیلی اسکوپ کے ذریعے دیکھا جاسکے گا۔
یہاں یہ بات قابل ذکر ہے کہ اگر ترکی کا یہ مشن کامیاب رہا تو وہ چاند پر پہنچنے والا پہلا اسلامی ملک ہوگا۔
واضح رہے کہ 1969 میں پہلی بار چاند کو تسخیر کیا گیا تھا۔
نیل آرم اسٹرانگ تاریخ رقم کرنے والے وہ پہلے انسان تھے جنہوں نے چاند پر قدم رکھا تھا۔
