انقرہ: ترکی نے یکم جولائی سے کرونا وبا کی پابندیوں کو ختم کرنے کا اعلان کر دیا ہے۔
تفصیلات کے مطابق ترکی کرونا پابندیوں پر عمل درآمد کے بعد یکم جولائی سے معمولات زندگی کو لوٹنے کے تیسرے مرحلے میں داخل ہو رہا ہے، اس سلسلے میں داخلہ آفس نے مرحلہ وار معمولاتِ زندگی کی بحالی کے حوالے سے سرکولیشن 81 اضلاع کو بھیج دیا ہے۔
اس نوٹیفکیشن میں کہا گیا ہے کہ یکم جولائی سے لاک ڈاؤن کا نفاذ اپنے اختتام کو پہنچے گا، تمام تر کاروباری مراکز اور سینما گھر دوبارہ سے اپنی سرگرمیوں کو بحال کر دیں گے۔
کرفیو ختم کر دیا گیا ہے، کیفے اور ریستورانز میں اِن ڈور اور آؤٹ ڈور ایریاز میں مہمانوں کی تعداد پر کوئی پابندی نہیں رہے گی۔
ہوٹلز میں قیام کی اجازت بھی دے دی گئی ہے، تاہم ایس او پیز کے تحت صفائی ستھرائی، ماسک کے استعمال اور سماجی فاصلے کی تعمیل برقرار رکھی جائے گی، شادی بیاہ کی تقریبات میں حد بندی کا خاتمہ ہو جائے گا، اور مہمانوں کی اس دوران خاطر تواضع پر پابندی نہیں ہوگی۔
اصولوں کے مطابق میوزک کانسرٹس، میلوں، یوتھ کیمپس جیسی سرگرمیوں کی بھی اجازت دے دی گئی ہے۔
چند ممالک سے آنے والے مسافروں کے لیے 14 دنوں کے قرنطینہ کی شرط بھی ختم کر دی گئی ہے، ان ممالک میں بنگلا دیش، برازیل، جنوبی افریقا، بھارت، نیپال اور سری لنکا شامل ہیں، تاہم انھیں پی سی آر ٹیسٹ پیش کرنا لازمی ہوگا۔
دوسری طرف پاکستان اور افغانستان سے آنے والے افراد 14 دن کی بجائے 10 دن تک قرنطینہ میں رہیں گے، اور ساتویں دن ان کا پی سی آر ٹیسٹ کیا جائے گا۔
