استنبول : موسم سرما کا آغاز ہوتے ہی دنیا کے مختلف ممالک میں طوفانوں نے تباہی مچا دی، ترکی میں طوفانی ہواؤں اور تیز بارش کے باعث مختلف حادثات میں 4 افراد ہلاک اور 19 زخمی ہوگئے۔
طوفانی بارش اور گرج چمک کے ساتھ آنے والے طوفان نے تباہی مچادی، استنبول میں طوفانی ہواؤں کی شدت سے کلاک ٹاور گرگیا، ہائی وے پر ٹرک الٹ گیا، سرکاری نشریاتی ادارے انادولو کے مطابق، پیر کو ترکی میں شدید آندھی کے طوفان کے بعد کم از کم چھ افراد ہلاک اور 52 زخمی ہو گئے اور منگل کو بھی ملک کے کچھ حصوں میں تباہی مچا دی۔
ترکی کے شہر استنبول کے ایک ساحل پر چلنے والی تیز ہواؤں اور بپھرتی سمندری لہروں کے باعث وہاں کھڑا بحری جہاز ہچکولے کھانے لگا۔
طوفانی ہواؤں کے باعث آبنائے باسفورس میں کشتیوں اور جہازوں کی آمد و رفت پر عارضی پابندی عائد کردی گئی ہے۔ استنبول اور ترکی کے دیگر حصوں میں شدید طوفان کے باعث نظامِ زندگی متاثر ہونے کی اطلاعات ہیں۔ طوفانی موسم سے استنبول اور اردگرد کے حصوں میں عمارتوں کو بھی نقصان پہنچا۔
غیر ملکی خبر رساں ادارے کی رپورٹ کے مطابق طوفانی ہواؤں کی رفتار 129 کلومیٹرفی گھنٹہ ریکارڈ کی گئی، طوفان کے باعث آبنائے باسفورس میں جہازوں کی آمد ورفت روک دی گئی، استنبول آنے والی پروازوں کا رُخ ملک کے دیگر حصوں کی جانب موڑ دیا گیا۔
