انقرہ : ترکی میں واقع امریکی سفارت خانے پر مسلح شدت پسندوں نے فائرنگ کردی، ترکی کے سیکیورٹی اداروں نے واقعے کا مقدمہ درج کرتے ہوئے ملزمان کی تلاش شروع کردی ہے۔
تفصیلات کے مطابق ترکی کے دارالحکومت انقرہ میں واقع امریکی سفارت خانے پر کار سوار ملزمان کی جانب سے حملہ کیا گیا ہے حملے کے نتیجے میں کوئی جانی نقصان نہیں ہوا تاہم حملہ آوروں کی گولیاں سفارت خانے کے باہر بنی چیک پوسٹ پر لگی۔
غیر ملکی خبر رساں ادارے کا کہنا تھا کہ فائرنگ کا واقعہ پیر کی صبح 5 بجے پیش آیا جب ایک سفید کار سفارت خانے کے سامنے رکی اور اندر بیھٹے حملہ آوروں نے گولیاں برسا دی۔
ترک حکام کا کہنا ہے کہ سیکیورٹی اداروں نے سفارت خانے پر حملے کا مقدمہ درج کرتے ہوئے حملہ آوروں کو حراست میں لینے کے لیے چھاپہ مار کارروائی شروع کردی ہے۔
غیر ملکی خبر رساں ادارے کا کہنا تھا کہ ترکی میں عید الاضحیٰ کی چھٹیوں کے باعث امریکی سفارت خانہ ایک ہفتے کے لیے بند ہے۔
یاد رہے کہ چند روز قبل امریکی صدر ڈونلڈ ٹرمپ نے یہ اعلان کیا تھا کہ وہ ترکی سے امریکا میں دھاتوں اور دھاتی مصنوعات کی درآمدات پر عائد کردہ محصولات کو دوگنا کر رہے ہیں۔
غیر ملکی خبر رساں ادارے کے مطابق امریکا کی جانب سے ترک مخالف بیان کے بعد ترک کی کرنسی لیرا بری طرح متاثر ہوئی ہے، جس کی قدر میں ریکاڑ کمی دیکھنے میں آئی ہے۔
طیب اردوگان نے امریکی پابندیوں پر رد عمل دیتے ہوئے حکومتی اراکین کو امریکی وزیر داخلہ اور وزیر انصاف کے ترکی میں موجود اثاثے منجمد کرنے کے احکامات جاری کردیئے۔
خیال رہے کہ امریکی پادری اینڈریو براؤنسن کی گرفتاری میں اہم کردار ادا کرنے والے ترک وزیر قانون و انصاف عبدالحمید گل اور وزیر داخلہ سلیمان سویلو پر امریکا نے پابندیاں عائد کردی ہیں۔
