انقرہ : ترکی کا کہنا ہے کہ خلیجی ممالک اور قطر کے درمیان تنازعے میں قطر ی حقوق کا ہرقیمت پر تحفظ کیا جائے گا جبکہ تنازعہ حل کرنے کیلئے مذاکرات کرنے ہونگے۔
تفصیلات کے مطابق قطر کے وزیر دفاع حمد بن علی العطیہ انقرہ پہنچے اور ترک وزیر دفاع فکری عسیک سے ملاقات کی، ترک وزیر دفاع کا کہنا تھا کہ کہ خلیجی ممالک آپس میں بھائی بھائی ہیں اور ان کے درمیان اختلافات کو سنجیدہ مذاکرات کے ذریعے حل کرنے کی ضرورت ہے ، بات چیت کے دوران قطر کے حقوق کا بھی احترام کیا جائے گا۔
ترکی وزیر دفاع نے کہا کہ قطر کے حقوق کا ہر قیمت پر تحفظ کیا جائے گا۔
دوسری جانب اقوام متحدہ نے الجزیرہ ٹی وی کی بندش کو نا قابل قبول قرار دیتے ہوئے کہا کہ یہ مطالبہ اظہار رائے کی آزادی پر پابندی لگانے کے مترادف ہے۔
خلیجی ممالک نے قطر کو تیرہ مطالبات کی فہرست دی تھی جسمیں الجزیرہ چینل کو بند کرنے کا مطالبہ بھی شامل تھا۔
اس سے قبل ترک صدر طیب اردگان نے قطر سے تعلقات کی شدید مخالفت کرتے ہوئے کہا تھا کہ ترکی قطر کو تنہا نہیں چھوڑے گا، عرب ممالک نے قطر سے تعلقات منقطع کرکے بڑی غلطی کی ہے، کسی کو تنہا کرنے اور پابندیاں لگانے سے بحران حل نہیں ہوگا
سعودی عرب سمیت 7 عرب ممالک نےقطرسےسفارتی تعلقات منقطع کردیے
واضح رہے کہ قطر کے ساتھ سعودی عرب سمیت 7 عرب ممالک نے سفارتی تعلقات ختم کردیئے تھے اور قطر پر دہشت گردوں کی حمایت کا الزام عائد کرتے ہوئے قطر پر اپنی زمینی، فضائی اور سمندری سرحدوں کو بند کردیا تھا۔
جس کے بعد قطری وزارت خارجہ نے سعودی عرب سمیت 7ملکوں کی جانب سے تعلقات منقطع کرنے کے فیصلے کوغیرمنصفانہ قرار دیا تھا اور کہا کہ فیصلے کو عجلت میں بغیر تحقیق کے ساتھ کیا گیا، جس کا ان ممالک کے پاس کوئی آئینی اور قانونی جوازموجود نہیں ہے۔