انقرہ (23 جنوری 2026): ترک وزیرخارجہ حاقان فدان نے کہا ہے کہ ترکی غزہ کی تعمیر نو اور امداد میں مدد کے لیے فورسز بھیجنے کو تیار ہے۔
ترک وزیرخارجہ حاقان فدان نے ورلڈ اکنامک فورم کے اجلاس میں ڈیووس میں ایک انٹرویو کے دوران کہا کہ ترکی غزہ کے مستقبل میں فعال کردار ادا کرنے کے لیے تیار ہے، جس میں فوج تعینات کرنا بھی شامل ہے۔
دی نیشنل کو دیے گئے خصوصی انٹرویو "آن دی ریکارڈ ود ہیڈلی گیمبل” میں حاقان فدان نے کہا ہم غزہ کے امن منصوبے میں اپنا حصہ ڈالنے کے لیے ہر ممکن کوشش کرنے کو تیار ہیں۔
انہوں نے مزید کہا ترکیہ اب امن بورڈ کا حصہ ہے، اب ہم غزہ کی ایگزیکٹو کمیٹی پر کام کر رہے ہیں اور بہت سی انسانی امداد بھی فراہم کر رہے ہیں، لیکن جیسا کہ میں نے کہا یہ کچھ ممالک کے ساتھ بحث و اتفاق رائے کے بعد ہوگا، اور دیکھتے ہیں کہ کیا ہوتا ہے۔
فدان نے کہا "ہم سمجھتے ہیں کہ صدر ٹرمپ ہی واحد شخص ہیں جو اسرائیل پر حقیقی دباؤ ڈال سکتے ہیں۔ اگر وہ چاہیں تو ان کے پاس اسرائیل پر دباؤ ڈالنے اور اسرائیل کے غلط رویے کو روکنے کی صلاحیت ہے۔”
واضح رہے کہ یہ بیان اس وقت سامنے آیا جب حکومتوں کے سربراہان اور سینیئر سیاستدانوں نے ورلڈ اکنامک فورم میں امریکی صدر ڈونلڈ ٹرمپ کی "بورڈ آف پیس” کے افتتاحی ایونٹ میں شرکت کی۔
اس بورڈ میں سعودی عرب، متحدہ عرب امارات، بحرین، قطر اور مصر سمیت کئی ممالک کے نمائندے شامل ہیں۔ اسرائیل اور حماس نے اکتوبر میں اس منصوبے پر دستخط کیے تھے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں