انقرہ: ترک صدر رجب طیب اردوان نے گزشتہ روز پیش آنے والے تیز گام ایکسپریس سانحے پر گہرے دکھ اور افسوس کا اظہار کرتے ہوئے غمزدہ خاندانوں سے اظہار تعیزت اور زخمیوں کی جلد صحتیابی کی دعاد کی ہے۔
تفصیلات کے مطابق ترکی کے صدر رجب طیب اردوان نے سانحہ تیز گام ایکسپریس میں قیمتی جانوں کے نقصان پر متاثرہ خاندانوں سے دلی ہمدردی کا اظہار کیا ہے۔
اپنے تعزیتی بیان میں صدر اردوان نے کہا کہ پاکستان کےعوام سےٹرین سانحے پرتعزیت کا اظہارکرتاہوں اور دعاگو ہوں کہ سانحے کے زخمی جلد صحتیاب ہوں۔
انہوں نے کہا کہ اللہ انسانیت کوایسےحادثات،آفتوں اور مصیبتوں سےمحفوظ رکھے۔
یہ بھی پڑھیں: برطانوی شاہی جوڑے کا تیزگام حادثے پر افسوس کا اظہار
اس سے قبل برطانوی شاہی جوڑے نے دکھ کا اظہار کرتے ہوئے کہا تھا کہ پاکستان دورے سے کچھ دن پہلے ہی لوٹے اور اب ٹرین حادثے کی خبر افسوسناک ہے، ہماری دعائیں اور ہمدردیاں ٹرین میں جاں بحق افراد کے متاثرین کے ساتھ ہیں۔
خیال رہے کہ گزشتہ روز کراچی سے راولپنڈی جانے والی تیز گام ایکسپریس میں پنجاب کے علاقے لیاقت پور کے قریب گیس سلینڈر پھٹنے سے آتشزدگی کے باعث 74 افراد جاں بحق اور متعدد مسافر زخمی ہوگئے تھے۔
تیزگام ایکسپریس کو حادثہ صبح چھ بجکر پندرہ منٹ پر پنجاب کے ضلع رحیم یار خان کی تحصیل لیاقت پور میں چنی گوٹھ کے نزدیک چک نمبر 6 کے تانوری اسٹیشن پر پیش آیا تھا۔
وزیراعظم عمران خان نے حادثے پر اپنے دکھ کا اظہار کرتے ہوئے غمزدہ خاندانوں سے تعزیت کا اظہار کیا تھا اور زخمیوں کو بہترین طبی سہولیات فراہم کرنے کی ہدایت کی تھی۔
