بھارت کے معاشی و اقتصادی حب ممبئی میں کھلے عام انتہائی مہلک یورینیم کی فروخت نے دنیا کو ہلا کر رکھ دیا۔
بھارت کے انسداد دہشتگردی اسکواڈ نے ممبئی سے انتہائی مہلک یورینیم کی فروخت کی کوشش کرنے والے دو ملزمان کو گرفتار کرلیا ہے۔
بھارتی میڈیا کے مطابق ملزمان کے قبضے سے 7 کلو گرام سے زائد یورینئیم برآمد ہوا جس کی مالیت 21 کروڑ بھارتی روپے بتائی جارہی ہے۔
انسداد دہشتگردی اسکواڈ کو اطلاعات ملی تھیں کہ کچھ لوگ یورینیم کی فروخت کیلئے خریدار ڈھونڈ رہے ہیں جس کے بعد ملزمان کیلئے جال بچھایا گیا اور انہیں کارروائی کر کے گرفتار کیا گیا۔
حکام کا کہنا ہے کہ گرفتار ملزمان سے تفتیش کر کے اس گھناؤنے عمل سے منسلک گروہ اور ساتھیوں کے بارے میں معلومات حاصل کررہے ہیں۔
بھارتی میڈیا کا کہنا ہے کہ ضبط کیا گیا یورینیم بھابھا ایٹمی ریسرچ سینٹر منتقل کر دیا گیا ہے جہاں کی جانچ کی جارہی ہے۔
