سری نگر: مقبوضہ کشمیر میں بھارتی سینٹرل ریزرو پولیس فورس کے 2 اہلکاروں نے خودکشی کر لی۔
تفصیلات کے مطابق مقبوضہ کشمیر میں بھارتی پولیس کے اہلکار اعصابی دباؤ کا شکار ہو کر خودکشی کرنے لگے۔مقبوضہ کشمیر کے علاقے اننت ناگ میں ایک سی آر پی ایف اہلکار نے کرونا کے خدشے پر خودکشی کی۔
ترجمان سی آر پی ایف کا کہنا تھا کہ اس بات کا کوئی ثبوت نہیں کہ اہلکار کو کرونا انفیکشن ہوا تھا انہوں نے کہا کہ ہم ٹیسٹ کی رپورٹ کا انتظار کر رہے ہیں۔ترجمان کا کہنا تھا کہ ہلاک ہونے والے افسر کا تعلق بھارتی ریاست راجستھان کے علاقے جیسلمیر سے تھا۔
کشمیر میڈیا سروس کے مطابق سی آر پی ایف کے اسسٹنٹ سب انسپکٹر فتح سنگھ نے آج صبض اپنی سروس رائفل سے خود کو گولی مار کر خودکشی کر لی۔بھارتی فورسز فائرنگ کی آواز سن کر علاقے میں پہنچیں تو خون میں لت پت فتح سنگھ کی لاش پائی گئی۔
فائرنگ کے اس واقعے سے مقبوضہ کشمیر میں جنوری 2007 سے خودکشی کرنے والے بھارتی فوج اور پولیس اہلکاروں کی تعداد 451 ہوگئی ہے۔
یاد رہے کہ رواں سال مارچ میں سی آر پی ایف کے 2 اہلکاروں کانسٹیبل سیجو اور کانسٹیبل وجے نے ایک دوسرے پر فائرنگ کر دی تھی جس کے نتیجے میں دونوں شدید زخمی ہوگئے تھے۔دونوں اہلکاروں کو فوری اسپتال منتقل کیا گیا تھا جہاں انہیں مردہ قرار دیا گیا۔
