The news is by your side.

Advertisement

پی پی اراکینِ قومی اسمبلی عذرا افضل اور ایاز سومرو مستعفیٰ

لاڑکانہ: پیپلز پارٹی کے اراکین قومی اسمبلی عذرا افضل پیچوہو اور ایاز سومرو نے اپنی نشستوں سے استعفیٰ دے دیا ہے، ان حلقوں سے بالترتیب آصف زرداری اور بلاول بھٹو ضمنی انتخاب لڑیں گے۔

اطلاعات کے مطابق قومی اسمبلی کے حلقہ 213 نواب شاہ سے منتخب ہونے والی پیپلز پارٹی کی رکنِ قومی اسمبلی اور آصف زرداری کی ہمشیرہ عذرا افضل پیچوہو نے استعفیٰ دے دیا ہے۔اس حلقے سے اب آصف علی زرداری ضمنی الیکشن میں حصہ لیں گے۔

اسی طرح قیادت کے فیصلے پر این اے 204 لاڑکانہ سے منتخب ہونے والے رکنِ قومی اسمبلی ایاز سومرو نے بھی استعفی دیا ہے، اس نشست سے پاکستان پیپلز پارٹی کے چیئرمین بلاول بھٹو زرداری ضمنی انتخاب لڑیں گے۔


اسی سے متعلق : آصف زرداری اور بلاول بھٹو کا ضمنی الیکشن لڑنے کا اعلان


اسمبلی قواعد کے تحت دونوں اراکین قومی اسمبلی اپنے استعفے قومی اسمبلی سیکریٹیریٹ میں جمع کرائیں گے، اسمبلی کا اجلاس منعقد ہونے پر اسپیکر قومی اسمبلی استعفیٰ منظور ہونے کا اعلان کریں گے اور الیکشن کمیشن آف پاکستان کو خالی نشستوں پر ضمنی انتخاب کرانے کی ہدایت جاری کریں گے۔

جس کے بعد الیکشن کمیشن ان دونوں نشستوں پر طے شدہ وقت کے اندر اندر انتخابی شیڈول کا اعلان کرے گی جس میں کاغذات نامزدگی جمع کرانے سے انتخابات کے دن تک کا مرحلہ وار طریقہ کار وضع ہوگا۔

یاد رہے کہ پیپلز پارٹی کی سابق چیئرمین شہید بے نظیر بھٹو کی نویں برسی کے موقع پر ایک بڑے جلسہ عام سے خطاب کرتے ہوئے آصف علی زرداری اور بلاول بھٹو نے ضمنی الیکشن لڑ کر پارلیمانی سیاست میں اہم کردار ادا کرنے کا اعلان کیا تھا۔

Print Friendly, PDF & Email

Comments

comments

یہ بھی پڑھیں