فیصل آباد: صوبہ پنجاب کے شہر فیصل آباد میں مبینہ پولیس مقابلے میں 2 ملزمان ہلاک ہوگئے، پولیس نے اسلحہ برآمد کرلیا۔
تفصیلات کے مطابق فیصل آباد کے چک 233 بائی پاس کے قریب مبینہ پولیس مقابلے میں 2 ملزمان مارے گئے۔
پولیس کے مطابق ملزمان نے اپنا ساتھی چھڑانے کے لیے پولیس پرحملہ کیا تھا، جوابی فائرنگ میں ارشد اورناصرنامی حملہ آورہلاک ہوئے۔
پولیس حکام کا کہنا ہے کہ ملزمان جھنگ روڈ پرپٹرول پمپ عملے کو لوٹنے میں ملوث تھے، ملزمان کی فائرنگ سے پمپ کے 2 ملازم جاں بحق ہوئے تھے۔
یاد رہے کہ گزشتہ سال پنجاب پولیس کے مبینہ مقابلوں میں 221 افراد ہلاک ہوئے، قصور میں سے سے زیادہ 22 افراد مارے گئے جبکہ لاہور میں 18 افراد ہلاک ہوئے۔
وہاڑی میں پولیس مقابلہ، 3 ملزمان ہلاک، دو زخمی حالت میں فرار
واضح رہے کہ گزشتہ سال اکتوبر میں پنجاب کے ضلع وہاڑی میں پولیس مقابلے کے نتیجے میں 3 ملزمان ہلاک ہوگئے تھے۔
پولیس کے مطابق اہلکاروں کی جوابی فائرنگ سے 3 ڈاکو موقع پر ہی ہلاک ہوگئے تھے، جبکہ دو ڈاکو زخمی حالت میں فرار ہونے میں کامیاب ہوگئے تھے۔
