واشنگٹن : جنوبی امریکی ریاست مسی سپی میں امریکی فوجی طیارہ گرکر تباہ ہوگیا جس کے نتیجے میں16 افراد ہلاک ہوگئے۔
امریکی میڈیا کے مطابق حادثہ مقامی وقت کے مطابق شام 4 بجے پیش آیا جب طیارہ سن فلاور کاؤنٹی لائن میں سویا بین کے کھیتوں کے نزدیک کریش ہوگیا۔
لیفلور کاؤنٹی ایمرجنسی مینیجمنٹ کے ڈائریکٹرفریڈ رینڈل نے حادثے میں 16 افراد کی ہلاکت کی تصدیق کی ہے۔
فریڈ رینڈل کا کہناہےکہ ہلاک ہونے والے تمام افراد میرین کورپس ایئرکرافٹ میں سوار تھےاورمسافروں میں سے کوئی بھی زندہ نہیں بچا۔
مسی سپی کے گورنر فل برائنٹ نے فیس بک پر جاری اپنے بیان میں کہا کہ اس سانحے میں ہلاک افراد کے لیے کی جانے والی دعاؤں میں ہمارا ساتھ دیں
انہوں نےکہاکہ یونیفارم میں ملبوس ہمارے مرد و خواتین ہماری آزادی کو محفوظ بنائے رکھنے کے لیے روز اپنی جان خطرے میں ڈالتے ہیں۔
واضح رہےکہ امریکی میرین کور نے گزشتہ شام KC-130 کو پیش آنے والے حادثے کی تصدیق کی تاہم حادثے کے حوالے سے مزید تفصیلات فراہم نہیں کیں۔
