دبئی: متحدہ عرب امارات میں رہنے والے شہریوں کی صحت کو یقینی بنانے کے لیے بھارتی شہر کیرالہ سے تازہ پھلوں اور سبزیوں کی امپورٹ پر پابندی عائد کردی گئی ہے، جبکہ جنوبی افریقہ سے زندہ جانوروں کی درآمد بھی بند کردی گئی ہے۔
تفصیلات کے مطابق یہ فیصلہ وزارت برائے ماحولیات نے شہریوں کو نپاح نامی خطرناک وائرس اور رفٹ ویلی بخار کو ملک میں داخل ہونے اور پھیلنے سے روکنے کے لیے کیا گیا ہے۔
منسٹری کا کہنا ہے کہ ’’ اس فیصلے سے ظاہر ہوتا ہے کہ ہم اپنے شہریوں کی صحت اور انہیں صحت بخش غذا کی فراہمی کے سلسلے میں مستعد ہیں اور بائیو سیفٹی کو یقینی بنانے کے لیے تمام تر اقدامات کریں گے اور وائرس کو ملک میں داخل ہونے سے پہلے ہی روک لیں گے‘‘۔
کیرالہ سے آنے والے فروٹ اور سبزیوں کو ورلڈ ہیلتھ آرگنائزیشن کی جانب سے نپاح نامی وائرس کی روک تھا م کے لیے پابندی کی فہرست میں ڈالا گیا ہے ، کہا جارہا ہے کہ یہ وائرس چمگادڑوں کے ذریعے آم ، کیلے اور کھجور میں منتقل ہورہا ہے تاہم اس کے بارے میں حتمی تحقیق ابھی سامنے نہیں آئی ہے۔
دوسری جانب جنوبی افریقہ سےآنے والے جانوروں کو بھی ورلڈ ہیلتھ آرگنائزیشن کی وارننگ کے بعد پابندی کی فہرست میں ڈالا گیا ہے تاکہ رفٹ ویلی بخار کو ملک میں داخل ہونے سے روکا جاسکے۔
