یو اے ای (یکم جنوری 2026) متحدہ عرب امارات میں صحت عامہ کے مفاد میں آج سے نیا ٹیکس نافذ کر دیا گیا ہے۔
العربیہ کے مطابق متحدہ عرب امارات نے انرجی ڈرنکس اور تمام گیس دار مشروبات کے خلاف قوانین مزید سخت کرتے ہوئے انتخابی ٹیکس عائد کر دیا ہے۔
متحدہ عرب امارات کی حکومت نے آج سے میٹھے مشروبات پر انتخابی ٹیکس کے حساب کے نئے طریقہ کار کے نفاذ کی منظوری دے دی ہے۔ یہ طریقہ کار حجم تدریجی ماڈل پر مبنی ہے جس کے تحت ہر لیٹر میٹھے مشروب پر عائد ٹیکس کو ہر 100 ملی لیٹر میں چینی اور دیگر مٹھاس کی مجموعی مقدار سے جوڑا جائے گا۔
وفاقی ٹیکس اتھارٹی نے وضاحت کی کہ نئے قواعد کے تحت میٹھے مشروبات کو چار درجوں میں تقسیم کر کے ان پر انتخابی ٹیکس عائد کیا گیا ہے۔
1۔ زیادہ چینی والے میٹھے مشروبات جن میں ہر 100 ملی لیٹر میں 8 گرام یا اس سے زیادہ چینی اور دیگر مٹھاس شامل ہو، ان پر فی لیٹر 1.09 درہم ٹیکس ہوگا۔
2۔ درمیانی مقدار کی چینی والے میٹھے مشروبات جن میں ہر 100 ملی لیٹر میں 5 گرام یا اس سے زیادہ مگر 8 گرام سے کم چینی اور دیگر مٹھاس ہو، ان پر فی لیٹر 0.79 درہم ٹیکس عائد ہوگا۔
3۔ کم چینی والے میٹھے مشروبات جن میں ہر 100 ملی لیٹر میں 5 گرام سے کم چینی اور دیگر مٹھاس ہو، ان پر فی لیٹر صفر درہم ٹیکس ہوگا۔
4۔ صنعتی طور پر میٹھے بنائے گئے مشروبات جن میں صرف مصنوعی مٹھاس شامل
ہو یا جن میں چینی اور دیگر مٹھاس کی مقدار ہر 100 ملی لیٹر میں 5 گرام سے کم ہو، ان پر بھی کوئی ٹیکس نہیں ہوگا۔
واضح رہے کہ انتخابی ٹیکس انرجی ڈرنکس، گیس دار مشروبات، میٹھے مشروبات، الیکٹرانک سگریٹ اور اس سے متعلق آلات اور ان میں استعمال ہونے والی مائعات، تمباکو اور دیگر مصنوعات پر لاگو کیا جا سکتا ہے۔ یہ ٹیکس صحت عامہ یا ماحول پر منفی اثر ڈالنے والی اشیا پر لگایا جاتا ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں