ابوظہبی: متحدہ عرب امارات کے وزیر مملکت برائے امور خارجہ ڈاکٹر انور قرقاش نے کہا ہے کہ حجاج پر پابندی قطر کی سب سے بڑی ناکامی ہے۔
تفصیلات کے مطابق اپنے ٹویٹر بیان میں ڈاکٹر انور قرقاش کا کہنا تھا کہہ قطری شہریوں کے لئے حج ادائیگی سے متعلق آسانیاں پیدا کرنے کی سعودی وزارت عمرہ وحج کی اپیل عاقلانہ فیصلہ ہے۔
غیرملکی خبررساں ادارے کے مطابق اپنے ٹویٹر پیغام میں انور قرقاش نے کہا کہ عازمین حج کی راہ میں رکاوٹیں کھڑی کرنا دراصل قطر کی جانب سے اپنے بحران کے حل میں ناکامی پر دلالت کرتا ہے۔
انہوں نے مطالبہ کیا کہ قطر حج ایسے اہم دینی فریضے کو سیاست کی نظر کرنے سے گریز کرے، قطری عازمین حج پر پابندی کی منطق اور دلیل کمزور موقف کی عکاس ہیں۔
سعودی عرب کی حج اور عمرے کی وزارت نے قطر میں متعلقہ حکام پر زور دیا ہے کہ وہ فریضہ حج کی ادائیگی کے خواہش مند قطری شہریوں کی مملکت آمد کو آسان بنائے اور اس حوالے سے قطری حکومت کی جانب سے عائد رکاوٹوں کو ختم کرے۔