ابو ظہبی: متحدہ عرب امارات میں کرونا وائرس کا کم عمر ترین مریض صحتمند ہوگیا، 9 سالہ فلپائنی بچے نے کچھ دن آئی سی یو میں بھی گزارے ہیں۔
غیر ملکی ویب سائٹ کے مطابق متحدہ عرب امارات میں کرونا وائرس کا کم عمر ترین مریض شفایاب ہوگیا ہے، وہ کچھ دن قبل تک آئی سی یو میں تھا۔
مقامی ذرائع ابلاغ کے مطابق خلیفہ میڈیکل سٹی میں زیر علاج 9 سالہ فلپائنی بچہ ہیرفی ایمانویل سب سے کم عمر مریض تھا، اسپتال انتظامیہ کا کہنا ہے کہ فلپائنی بچے کو کرونا ٹیسٹ رپورٹ مثبت آنے پر 22 مارچ کو قرنطینہ مرکز منتقل کرنا پڑا تھا۔
انتظامیہ کے مطابق چند دن قبل تک اس کی حالت نازک تھی، اسے آئی سی یو میں رکھا گیا تھا تاہم اب وہ بالکل صحت مند ہے۔
انتظامیہ کا کہنا ہے کہ کرونا ٹیسٹ کا نتیجہ منفی آنے پر اسے گھر بھیج دیا گیا ہے، اس موقع پر طبی عملے نے نہایت خوشی کا اظہار کیا اور تالیاں بجا کر اسے رخصت کیا جس پر بچہ آبدیدہ ہوگیا۔
شفاء أصغر طفل مصاب بـ "كورونا” وخروجه من "خليفة الطبية”
#الإمارات_اليوم pic.twitter.com/fE99RpaRR7
— الإمارات اليوم (@emaratalyoum) April 21, 2020
کرونا سے شفایاب ہونے والا مذکورہ بچہ اپنے والدین کی اکلوتی اولاد ہے جو امارات میں مقیم ہیں۔
خیال رہے کہ متحدہ عرب امارات میں اب تک کرونا وائرس کے 8 ہزار 238 کیسز کی تصدیق ہوچکی ہے جبکہ اب تک 52 افراد جاں بحق ہوچکے ہیں۔