ابوظبی: متحدہ عرب امارات کی ریاست ابوظبی کی بلدیاتی کونسل نے گاڑیوں کے مالکان کو خبردار کردیا۔
عرب میڈیا کے مطابق ابوظبی بلدیاتی کونسل کا کہنا ہے کہ گاڑیاں صاف نہ رکھنے پر تین ہزار درہم جرمانہ ہوگا، جرمانے کا ٹوکن جاری کیے جانے کی تاریخ سے ایک ماہ کے اندر جرمانہ جمع کروانے پر 50 فیصد رعایت دی جائے گی۔
بلدیاتی کونسل نے تاکید کی کہ گاڑی کو صاف نہ رکھنا خلاف ورزی ہے، گاڑیوں کے ساتھ لاپروائی برتنے پر تادیبی کارروائی ہوگی، گاڑی گندی ہونے پر روک لی جائے گی۔
ابوظبی کی بلدیاتی کونسل نے گاڑیوں کی صفائی کے حوالے سے پانچ روزہ خصوصی آگاہی مہم شروع کی تھی جس میں معاشرے کے تمام طبقوں کو اس کے نتائج سے آگاہ کیا گیا۔
مزید پڑھیں: ابوظبی: نان رجسٹرڈ گاڑیوں کا چالان نہیں ہوگا، محکمہ ٹریفک کا اعلان
بلدیاتی کونسل کا کہنا ہے کہ سڑکوں، چوراہوں اور تمام پبلک مقامات پر کھڑی ایسی گاڑیوں پر انتباہی اسٹیکر چسپاں کردیا جاتا ہے۔
حکام کے مطابق اگر تین دن کے اندر گاڑی صاف نہ کی گئی یا اسے وہاں سے ہٹایا نہ گیا تو ایسی صورت میں مالک پر تین ہزار درہم کا جرمانہ ہوگا، 30 دن کے اندر جرمانہ ادا کرنا ہوگا ایسا کیا گیا تو 50 فیصد رعایت ہوگی۔
