دبئی : متحدہ عرب امارات میں ملازمت کرنے والے 30 سالہ بھارتی نوجوان نے 1 کروڑ اماراتی درہم کی خطیر رقم لاٹری جیت لی۔
تفصیلات کے مطابق بھارت سے تعلق رکھنے والے نوجوان بریٹی مارکوس نے 1 کروڑ اماراتی درہم کی رقم ڈیوٹی فری لاٹری میں جیتی ہے, جو 19 کروڑ 85 لاکھ بھارتی روپے سے زائد کی رقم بنتی ہے۔
بریٹی مارکوس نے متحدہ عرب امارات کی تاریخ کی سب سے بڑی لاٹری جیتی ہے۔
بھارتی نوجوان کا کہنا تھا کہ میں نے ابوظہبی کے ہوائی اڈے نے ڈیوٹی فری لاٹری کا ٹکٹ خریدا تھا جب مجھے لاٹری انتظامیہ کی جانب سے انعامی رقم جیتنے کا فون موصول ہوا تو میں حیران رہ گیا اور میرے الفاظ ختم ہوگئے۔
بھارتی نوجوان کا کہنا تھا کہ میں مسلسل فون پر انتظامیہ کا شکریہ ادا کرتا رہا۔
اماراتی خبر رساں ادارے کا کہنا تھا کہ ایک کروڑ درہم کا جیک پوٹ کا اعلان ہفتے کی صبح ابوظہبی کے عالمی ہوائی اڈے پر کیا گیا تھا۔
مقامی خبر رساں ادارے کے مطابق مارکوس نے لاٹری کا ٹکٹ ایئر پورٹ سے خریدا تھا، جس کا نمبر 208011 تھا، لاٹری جیتنے والے خوش نصیب کا اعلان آج صبح کیا گیا تھا۔
اماراتی میڈیا کا کہنا ہے کہ ڈیوٹی فری لاٹری جیتنے والے 10 خوش نصیب افراد میں 9 کا تعلق بھارت سے ہے جبکہ ایک پاکستانی شہری ہے جو لاٹری جیتنے والے پہلے دس افراد میں شامل ہے۔
اماراتی میڈیا کا کہنا تھا کہ پاکستانی شہری وارث علی سردار علی نے پانچواں انعام جیتا ہے جس کی انعامی رقم 70 ہزار اماراتی درہم ہے، جو پاکستانی روپے میں 25 لاکھ 47 ہزار بنتی ہے۔
یو اے ای: بھارتی شہری نے 36 لاکھ درہم کی لاٹری جیت لی
یاد رہے کہ اس سے قبل بھی دبئی کے عالمی ہوائی اڈے پر لاٹری کا ٹکٹ خریدنے والے 45 سالہ بھارتی شہری نے 36 لاکھ اماراتی درہم (13 کروڑ سے زائد پاکستانی روپے) انعام میں جیتے تھے۔
