ابو ظہبی: متحدہ عرب امارات نے سیاحوں کو خوشخبری سناتے ہوئے کہا ہے کہ 18 سال سے کم عمر بچوں سے ویزا فیس نہیں لی جائے گی۔
بین الاقوامی ویب سائٹ کے مطابق متحدہ عرب امارات میں شہریت و قومیت کے وفاقی ادارے نے کہا ہے کہ سیاحوں کے ہمراہ آنے والے 18 برس سے کم عمر بچوں سے ویزا فیس نہیں لی جائے گی۔
اس فیصلے پر 15 جولائی سے 15 ستمبر تک عمل درآمد کیا جائے گا۔
میڈیا رپورٹ کے مطابق ویزا فیس سے استثنیٰ کا فائدہ سیاح کے 18 برس سے کم عمر کے ان بیٹوں اور بیٹیوں کو ہوگا جو والدین یا ان میں سے کسی ایک کے ہمراہ سیاحتی ویزے پر امارات آرہے ہوں گے۔
سیاحتی ویزا محدود مدتی ہو یا طویل مدت کا، دونوں صورتوں میں سیاح کے 18 سال سے کم عمر بچے ویزا فیس سے مستثنیٰ ہوں گے۔
خیال رہے کہ اماراتی کابینہ نے سنہ 2019 میں فیصلہ کیا تھا کہ طلبہ اور 18 برس سے کم عمر کے سیاحوں کو امارات آنے کے لیے سہولیات دی جائیں گی۔
یہ فیصلہ امارات کو پوری دنیا میں تعلیمی اور سیاحتی اعتبار سے پرکشش بنانے کی پالیسی کے تحت کیا گیا ہے۔
