ابوظہبی: متحدہ عرب امارات نے وبا سے لڑنے کے لیے طبی سامان سے بھرے دو کارگو طیارے تیونس پہنچا دیے۔
عرب میڈیا کی رپورٹ کے مطابق اماراتی حکومت کی جانب سے تیونس کو دی گئی یہ دوسری امدادی کھیپ ہے، اس سے قبل بھی طبی سہولیات اور آلات سے لدے جہاز تیونس پہنچائے جاچکے ہیں۔
یتونس میں تعینات اماراتی سفیر راشد محمد ال منصوری کا کہنا ہے کہ یہاں کورونا کی صورت حال کا بغور جائزہ لے رہا ہوں، اسی ضمن میں طبی امداد فراہم کی گئی۔
ان کا کہنا تھا کہ متحدہ عرب امارات دنیا بھر میں وبائی بحران کا مقابلہ کرنے کیلئے اپنی خدمات فراہم کررہا ہے۔ یاد رہے کہ گزشتہ ماہ یو اے ای نے تقریباً 5 لاکھ کوروناویکسین کی ڈوز بھی تیونس کو فراہم کی۔
شاہ سلمان نے انسانی ہمدردی کی ایک اور نئی مثال قائم کردی
اسی طرح نومبر 2020 میں بھی کئی ٹن طبی سامان امارات کی جانب سے تیونس کو دیا گیا۔ وبا کے خلاف مشن کے تحت یو اے ای اب تک 135 ممالک کی مدد کرچکا ہے اور یہ سلسلہ جاری ہے۔
یاد رہے کہ رواں سال جولائی میں سعودی فرمانروا کے فلاحی ادارے(کے ایس ریلیف) نے بھی طبی آلات اور سہولیات سے لدے دو طیارے تیونس پہنچائے تھے جو عالمی کورونا وبا سے مقابلے میں معاونت کررہے ہیں۔ تیونس کے صدر نے کورونا صورت حال کے پیش نظر سعودی حکومت سے مدد کی اپیل کی تھی۔