ابوظہبی: متحدہ عرب امارات میں شہری کو جھوٹی خبریں شائع کرنا مہنگا پڑگیا، عدالت نے دس سال قید کی سزا سنا دی اور بھاری جرمانہ بھی عائد کردیا۔
تفصیلات کے مطابق اماراتی شہری کو ریاستی پالیسی کے خلاف جھوٹی اور من گھڑت خبریں شائع کرنے پر مقامی عدالت نے ایک ملین درہم کا جرمانہ سمیت دس سال قید کی سزا سنا دی۔
غیر ملکی خبر رساں ادارے کے مطابق 49 سالہ ’احمد منصور الاشاہی‘ خبررساں ویب سائٹ اور دیگر سماجی رابطے کی ویب سائٹ پر حقیقت کے منافی خبریں لگاتا تھا، جس کے باعث اسے سخت سزا ہوئی۔
حکام نے مجرم احمد منصور کے زیر استعمال تمام تر ابلاغ کے ذرائع کو اپنے قبضے میں لےکر شائع کی گئیں خبریں ہٹادیں، اور ویب سائٹ کو بھی معطل کردیا۔
عدالت نے موقف اختیار کیا ہے کہ مجرم کے دہشت گرد تنظیموں سے بھی روابط ہیں، اور یہ ان کی ریاست مخالف سرگرمیوں میں تعاون بھی کرتا رہا ہے۔
عدالت نے احمد منصور کی جانب سے پیش کی گئی نظر ثانی اپیل بھی مسترد کردی۔
میڈیا مخالف بیانات، 300 اخبارات کی صدر ٹرمپ کے خلاف مہم
خیال رہے کہ سزا پانے والے شہری کو گذشتہ سال مئی میں ریاست مخالف سرگرمیوں میں ملوث ہونے اور جھوٹی خبروں کا پرچار کرنے پر گرفتار کیا گیا تھا، بعد ازاں اس کے خلاف عدالت میں متعدد سماعتیں ہوئیں اور فیصلہ سنایا گیا۔
فیصلے کے بعد مجرم نے نظرثانی کی اپیل کی، تاہم عدالت نے پانچ سماعتوں کے بعد اپیل مسترد کرتے ہوئے اپنے فیصلے کو بحال کردیا۔
واضح رہے کہ مجرم سزا کے آغاز سے لے کر تین سال تک عدالت کی زیر نگرانی رہے گا۔
