لندن: بریگزٹ کے بعد برطانیہ کی آسٹریلیا سے پہلی فری ٹریڈ ڈیل ہو گئی۔
برطانیو ی میڈیا کے مطابق برطانیہ اور آسٹریلیا کے درمیان بریگزٹ کے بعد پہلی آزاد تجارت کا معاہدہ ہو گیا ہے، دونوں ممالک کے وزرائے اعظم نے ڈیل پر خوشی میں بسکٹ کا تبادلہ کیا۔
برطانوی وزیر اعظم بورس جانسن نے ٹوئٹ میں بھی خبر دی کہ آسٹریلیا کے ساتھ ڈیل ہو گئی ہے، جب کہ برطانوی میڈیا کا کہنا ہے کہ دونوں ممالک ٹیکنالوجی، سیکیورٹی، سائنس، اور موسمیاتی تبدیلیوں پر ایک دوسرے کے ساتھ تعاون کریں گے۔
برطانوی حکومت نے منگل کو کہا کہ فری ٹریڈ ایگریمنٹ کا مطلب ہے کہ برطانوی کمپنیوں کو آسٹریلیا میں کاریں، سرامکس، بسکٹ اور مٹھائیوں جیسی مصنوعات کی فروخت پر کم لاگت اٹھانی پڑے گی۔
The deal is done! 🇬🇧🇦🇺 pic.twitter.com/vlgjJqxTUk
— Boris Johnson (@BorisJohnson) June 15, 2021
اس ڈیل کے سبب برطانوی صنعتوں کو فروغ ملے گا جہاں ملک بھر میں 35 لاکھ افراد کام کر رہے ہیں، بورس جانسن نے کہا کہ یہ ڈیل برطانیہ اور آسٹریلیا کے تعلقات میں ایک نئی صبح کی طرح ہے۔
برطانوی وزیر اعظم نے کہا کہ یہ نیا فری ٹریڈ ایگریمنٹ برطانوی کاروبار اور صارفین کے لیے شان دار مواقع فراہم کرے گا۔
یہ معاہدہ پیر کو رات گئے کیا گیا تھا، آسٹریلیا کے وزیر تجارت نے کہا تھا کہ بورس جانسن اور آسٹریلوی وزیر اعظم اسکاٹ موریسن نے لندن میں ڈاؤننگ اسٹریٹ میں ایک عشائیے کے موقع پر معاہدے کی وسیع شرائط پر اتفاق کر لیا ہے۔
