اسلام آباد: پاکستان میں جاری سیلاب کی بدترین تباہ کاریوں پر برطانیہ نے امداد کا اعلان کردیا۔
تفصیلات کے مطابق برطانوی ہائی کمیشن اسلام آباد سے جاری بیان کے مطابق برطانیہ نے پاکستان میں سیلاب متاثرین کیلئے1.5ملین پاؤنڈزامداد کا اعلان کیا ہے۔
برطانوی ہائی کمیشن نے کہا کہ شدید مون سون بارشوں نےلاکھوں افراد کومتاثرکیا ہے، پاکستان کے جنوب میں سیلاب سےتقریباً900 افراد کی ہلاکت ہوئی، کم وبیش 7 لاکھ گھر تباہ ہوچکے ہیں، قدرتی آفت سےنمٹنےکیلئےبرطانیہ نے فوری امداد فراہم کرنے کا فیصلہ کیا ہے۔
This is a time to stand together: 🇬🇧 is providing urgent support of £1.5m for #FloodRelief cc @Sherryrehman @NdmaPk 👇 https://t.co/zAxZ3F8iEu
— Christian Turner (@CTurnerFCDO) August 27, 2022
برطانوی ہائی کمیشن نے کہا کہ اقوام متحدہ رواں ہفتے کے آخر میں پاکستان میں آفت کے باعث ضروریات کا جائزہ لے رہا ہے، توقع ہے کہ منگل کو اقوام متحدہ کی (پاکستان کی امداد کے لئے) اپیل شروع کی جائے گی۔
ادھر نمائندہ خصوصی برائے برطانوی وزیراعظم لارڈ طارق احمد نے کہا کہ ہم پاکستانی حکام کے ساتھ بھی براہ راست کام کر رہے ہیں، میں امدادی سرگرمیوں میں شامل ہر فرد کو خراج تحسین پیش کرنا چاہوں گا۔
انہوں نے کہا کہ ہم اس تباہی کا مشاہدہ کر رہے ہیں جو موسمیاتی تبدیلی کا سبب بن سکتی ہے، اور سب سے زیادہ کمزور لوگوں کو متاثر کرتی ہے، برطانیہ فوری مدد کے لیے 1.5 ملین پاؤنڈ تک فراہم کر رہا ہے۔