کراچی: سول ایوی ایشن اتھارٹی (سی اے اے) کا کہنا ہے کہ برطانیہ کی جانب سے پاکستانی ایئرپورٹس کے لیے جدید اسکیننگ مشینوں کا تحفہ دیا جا رہا ہے۔
تفصیلات کے مطابق برطانوی ڈی ایف ٹی کی جانب سے پاکستان کے 2 بڑے ایئر پورٹس پر سیکیورٹی کو مؤثر بنانے کے لیے جدید بیگجز اسکیننگ مشینیں تحفے کے طور پر فراہم کی جائیں گی۔
برطانوی سیکیورٹی ایجنسی ڈی ایف ٹی کی جانب سے پہلے مرحلے میں جدید ٹیکنالوجی سے آراستہ بیگجز مشینیں علامہ اقبال انٹرنیشنل اور جناح انٹرنیشنل ایئرپورٹ پرفراہم کی جا رہی ہیں۔
یہ جدید مشین مسافروں کے سامان کے ساتھ ساتھ جہاز کے لیے نقصان دہ آلات اور بارودی مواد کو جانچنے کی صلاحیت بھی رکھتی ہے۔
ذرائع کے مطابق ڈیپارٹمنٹ فار ٹرانسپورٹ کی جانب سے یہ مشینیں ایک ماہ کے اندر پاکستان پہنچ جائیں گی۔
ڈی ایف ٹی کی جانب سے فراہم کردہ مشینوں کو لگانے کا مقصد برطانیہ آنے والے مسافروں اور ان کے سامان کی اسکیننگ جدید طرز پر کرنا ہے، مرحلہ وار دیگر ایئر پورٹس پر بھی یہ مشینیں سول ایوی ایشن کو تحفے کے طور پر فراہم کی جائیں گی۔
