لندن: برطانیہ میں رمضان المبارک کا چاند نظر آگیا، سینٹرل لندن ماسک کے مطابق فرزندان توحید کل پہلا روزہ رکھیں گے۔ برطانوی وزیر صحت نے کہا ہے کہ کرونا کی وجہ سے مسلمان رمضان میں اجتماع نہیں کرسکیں گے جس پر ہمیں دلی افسوس ہے۔
نمائندہ اے آر وائی نیوز کے مطابق سینٹرل لندن ماسک نے رمضان المبارک کا چاند نظر آنے کا اعلان کرتے ہوئے کہا کہ برطانیہ میں مسلمان چوبیس اپریل کو پہلا روزہ رکھیں گے۔
سینٹرل لندن ماسک کے مطابق کرونا وائرس کے پیش نظر رمضان المبارک کے دوران مساجد بند رہیں گی اور تراویح کا اہتمام بھی نہیں کیا جائے گا، ماہ صیام میں حکومت کی ہدایات پر مکمل عمل درآمد کیا جائے گا۔
دوسری جانب سینٹرل لندن مسجد نے بھی رمضان المبارک کا چاند نظر آنے کا اعلان کردیا۔ اعلامیے میں کہا گیا ہے کہ کرونا وائرس کی روک تھام کے حوالے سے اٹھائے جانے والے اقدامات کے تحت ماہ صیام میں ماسجد بند رہیں گی اور تراویح کا اہتمام نہیں کیا جائے گا۔
برطانوی وزیر صحت کا خیر مقدم
برطانوی وزیر صحت نے مسلمانوں کا شکریہ ادا کرتے ہوئے کہا ہے کہ رمضان مسلمانوں کیلئے انتہائی اہم مہینہ ہے،کرونا کی وجہ سےمسلمان رمضان میں اجتماع نہیں کرسکیں گے، جس پر ہمیں افسوس ہے۔
اُن کا کہنا تھا کہ مسلمان برطانوی معاشرے میں اہم کردار ادا کررہے ہیں۔ برطانوی وزیر صحت نے خدشہ ظاہر کیا کہ عید کا تہوار بھی کرونا وائرس کی وجہ سے متاثر ہوسکتا ہے۔
