The news is by your side.

Advertisement

برطانیہ نے کرونا وائرس ویکسین کی کروڑوں خوراکوں کا معاہدہ کرلیا

لندن: برطانیہ نے کرونا وائرس ویکسین کی 350 ملین (35 کروڑ) خوراکوں کا معاہدہ کرلیا، یہ ڈوزز برطانوی آبادی کی ضروریات کو پورا کرنے کے لیے کافی ہوں گی۔

بین الاقوامی میڈیا کے مطابق برطانوی محکمہ صحت نے انکشاف کیا ہے کہ 6 مختلف ڈیولپرز کے ساتھ کرونا وائرس کے خلاف تیار کی جانے والی ویکسین کی 350 ملین خوراکوں کا معاہدہ طے کیا جا چکا ہے جو برطانوی آبادی کی ضروریات کو پورا کرنے کے لیے کافی ہوگا۔

ترجمان محکمہ صحت کا کہنا ہے کہ کرونا ویکسین کی خوراک این ایچ ایس کی طرف سے متاثرین کو مفت مہیا کی جائے گی، نجی کمپنیوں کے لیے ویکسین پہلے آئیں پہلے پائیں کی بنیاد پر دستیابی کو یقینی بنایا جائے گا۔ گھروں سے تاخیر سے نکلنے والے اس سہولت سے محروم رہ سکتے ہیں۔

ڈپٹی چیف میڈیکل آفیسر پروفیسر جوناتھن وان تام کے مطابق کرونا وائرس سے سب سے زیادہ خطرے کا شکار جیسے بزرگ افراد اور کینسر کے مریضوں کو اولین ترجیحات پر معیاری ویکسین دی جائے گی۔

ادویات ساز کمپنیوں فائزر اور بائیو ٹیک نے اپنی تیار کردہ ویکسین کی 90 فیصد مؤثر ہونے کی تصدیق کرتے ہوئے اگلے ماہ سے اسے فراہم کرنے کا اعلان کیا ہے، ویکسین کو کب، کہاں، کیسے اور کتنی مقدار میں تقسیم کیا جائے گا اس کا حتمی فیصلہ حکومتی مشینری کرے گی۔

برطانوی عوام نے کرونا وائرس کے خلاف ویکسین کی تیاری کو بڑی کامیابی قرار دیتے ہوئے کہا ہے کہ ویکسین کی دستیابی سے برطانیہ پہلے کی طرح معمول کی زندگی کی جانب لوٹ آئے گا۔

برطانیہ میں کرونا وائرس اور لاک ڈاؤن کے باعث معیشت کو ناقابل تلافی نقصان پہنچ چکا ہے۔

Comments

یہ بھی پڑھیں