لندن: کشمیر کے معاملے میں کردار ادا کرنے سے متعلق پٹیشن برطانوی پارلیمنٹ کی ویب سائٹ پر دائر کردی گئی۔
تفصیلات کے مطابق پٹیشن کے ذریعے برطانوی پارلیمنٹ سے مطالبہ کیا گیا ہے کہ وہ مسئلہ کشمیر کے حل کیلئے اپنا کردار ادا کرے۔
پٹیشن پاکستانی نژاد برطانوی شہری مدیحہ انصاری نے دائر کی، پٹیشن پر ایک لاکھ دستخط مکمل ہونے پر پارلیمنٹ اس پر بحث کرے گی۔
پٹیشن میں کہا گیا ہے کہ مقبوضہ کشمیر کی حیثیت ختم کرنے سے خطے میں خطرناک صورت حال پیدا ہوئی، برطانیہ معاملے کے حل کیلئے مداخلت کرے۔
برطانوی رکن پارلیمنٹ عمران چوہدری کا کہنا تھا کہ بھارت نے مقبوضہ کشمیر کی خصوصی حیثیت ختم کرکے غیرآئینی اقدام کیا۔
ادھر بھارت کو سفارتی سطح پر ایک اور بڑی نا کامی کا سامنا کرنا پڑا ہے، برسلز میں یورپی پارلیمان میں مسئلہ کشمیر پر ان کیمرا بریفنگ نے بھارتی کوششوں کو ناکام بنا دیا۔
بھارت نے مقبوضہ کشمیر کو انسانی جیل میں بدل دیا ہے، برطانوی رکن پارلیمنٹ
خیال رہے کہ 70 رکنی اجلاس کے اکثر ارکان نے تجویز کی حمایت کی، فل بینئن نے کہا معاملہ دو طرفہ قرار دے کر ختم نہیں کیا جا سکتا، بھارت کو مذاکرات کی میز پر لانے کے لیے دباؤ ڈالنا ہوگا۔
واضح رہے کہ یورپی پارلیمنٹ کی خارجہ کمیٹی نے مسئلہ کشمیر پر رپورٹ طلب کی تھی، وزیر خارجہ شاہ محمود قریشی نے کہا تھا کہ یورپی یونین پارلیمنٹ میں مسئلہ کشمیر پر اجلاس بڑی کام یابی ہے، اجلاس میں وزیر اعظم آزاد کشمیر بھی شریک ہوں گے۔
